Tim perubat Sepital Miri mujur ngaga ‘program outreach’ di Bario
MIRI: ‘Kita enda ulih meretika pengidup orang bukai dataika kita ngasaika pejalai idup nya empu’ – nyenggala nerangka peneleba ti diasaika tim staf perubat ti bejalaika program outreach keterubah sida ngagai Bario.
Tim datai ari raban pakar ari Opis Orthopaedic Sepital Miri, bala pemesai perubat sereta indu misi, serera mega raban pakar enggau indu misi ari opis Obstetrics enggau Gynaecology.
“Kelimpah ari wilayah Miri, opis kami mega (Orthopaedic) suah ngenataika servis kami ngagai peranak di Marudi, Limbang, enggau Lawas nengah pejalai klinik pakar betimpuh ngagai sepital sida empu.
“Tang kitai udah ngelaungka Bario ari servis ketegal isu perengka pengangkut,” ku Dr. Norzatulsyima Nasirudin, ke nyadi ketuai tim bekunsika peneleba.
Taja pia ku iya nambah, taja bisi isu perengka pengangkut, opis sida udah netapka diri bejalaika program outreach keterubah sida ngagai Bario kandang dua bulan ke udah, kena 30 April.
Pejalai nya empu nyadi siti pemar laban ngaul betepanka bilun mit ti chukup bepanggai ba gaya hari.
“Baka menua ti dilawa di entigis, kami betampung bilun ngagai Miri ti nyadi mengeri pemadu semak, lalu tu begunaka 45 minit terebai nepan MAS Wings Twin Otter ti terebai dua kali seminggu. Tau dikumbai penerebai ti lanchar lalu kami ngira diri diberekat.”
Alternatif dikena terebai, ku iya, deka begunaka 10 ngagai 14 jam pejalai darat nepan 4WD nengah jalai batang beralun, ke alai pemar ditapi bala mayuh.
“Baka kami fokus ngagai tuju ngemai servis ngintu pengerai ngagai sida ti bisi tatak ba perengka ngintu pengerai, pejalai datai ari bala staf perubat nyediaka perubat enggau beperesa pengerai pemun, nyediaka konsultan orthopaedic sereta mega ngenataika pelajar pengerai bekaul enggau orthopaedic ngagai peranak di menua ulu,” ku iya.
Penatai tim sida ngasaika penyelap kesuh angina ari bukit, umai beikar pemesai, rampa kampung ti agi gadung sereta mega peranak bansa Kelabit ti chukup kemerah.
Tumu pagi hari siti pengudah sida datai, tim udah numbuhka klinik sida, ti disaup Klinik Pengerai Bario.
Hari klinik keterubah, tim perubat mujur meri servis ngagai 15 iku sida ti sakit, ke alai sekeda ari sida patut nampung perubat silik agi baka ‘radiography’, ‘laboratory tests’ enggau ‘inter-specialty referral’ ti semina bisi di Sepital Miri tauka perengka perubat besemak di Sepital Pelilih Marudi.
“Tu ukai pengawa ti muntang ngagai tim, berindik ari bemacham kes udah diputarka kitai. Puji Tuhan, bekal ubat betaka ti dibai kelebih agi ungkup program outreach ulih tetangkupka peminta,” ku iya.
Siti ari kes meruan dikingat, ku iya nyebut, peluang ngubat siku indu bansa kelabit beumur 102 taun ti diau di Rumah Panjai Bario Asal.
“Tu peneleba chukup besai sereta hak istimewa mantu sida, berebak enggau nya, ngasuh kami alit ati baka ni klinik genturung pendiau mit enggau pemansut sereta sambung bisi taka ngagai dunya luar ulih ngintu pengerai peranak di Bario.
“Pengepuh gaya bala staf Klinik Pengerai chukup ngemegah lalu endang patut dibasa ba pemanah pengawa enggau kereja sida,” ku iya.
Pejalai ngagai Bario udah muka mata bala tim nya, ku Dr. Norzatulsyima, ngujungka diau bemalam empat malam di Rumah Panjai Bario Asal, ngasuh sida berat ati deka pulai.
“Peneleba ti diasaika kami di Bario chukup berega. Taja menua udah mansang meruan ngelama tu, bisi agi menua baka Bario begunaka perati lebih ari ke bukai.
“Pejalai ngabas rumah ngemai kami ngagai rumah bansa Penan ke alai kami ngubat siku lelaki biak bansa Penan ti udah beputung kolostomi. Gaya pendiau idup enda manah diakim ari standard pengidup kitai di mengeri, ke alai iya ti sakit enggau sida sebilik ngumbai langkau nyadika bilik penaik sida, tang ba sida, udah manah bisi perabung mayung pala sida.
“Nadai agu enggau sistem entali ai ti meruan, nadai pemansut ai beresi ti menuana sereta gaya pendiau sida balat ngasuh ati sinu lebuh meda enggau mata diri empu,” ku iya.
Meri tapi puji ngagai tim ti udah ngemai semangat siti tim enggau pengeran sida, Dr. Norzatulsyima Nasirudin meri tabi puji ngagai semua baka kaban tim nyengkaum Ismyth Abd Rahman (mandal chairman), Dr. Nur Shakinah Ajak (sekretari), Dr Mohamad Norazrin Mohd Abas (tukang wang), Dr. Tan Lip Siang, Dr. Noorhuda Abdul Mutalif, Dr. Norhana Mohamaed Ali, Dr. Muhd Ridzuan Hussin, Dr. Rashdeep Singh Jagdeb Singh, Dr. Mohamad Aizat Bin Mohamad Zahari, Dr. Reyna Hendrick, Dr. Nadirah Suni, Dr. Dalvin Kaur Karlsey, Dr. Stefi Wong, sereta mega Matron Chieng Sui Hoon enggau bala ketuai indu misi sereta penulung perubat ti ngemujurka pejalai nya.
“Nyadi peranak Malaysia enggau raban profesional ngintu pengerai, kami berasai temegah sereta lantang ke alai kami udah ulih gawaka rayat ke diau di kandang menua pesisir, taja semina enda lama. Tentu mega tu nunjukka kami ke alai mayuh menua begunaka kami, lalu enti kami ulih ngelawa menua nya, kami tentu deka bisi dia,” ku iya.