BPAKK ditumbuh ke penegap pemansang nembiak mit
KUCHING: Bahagian Pembangunan Awal Kanak-Kanak (BPAKK) diperambu deka ditumbuhka dikena ngenegapka pemansang nembiak mit di nengeri tu.
Menteri iya, Dato Sri Fatimah Abdullah madahka, keretas perambu bekaul enggau penumbuh nya deka dibantaika ba aum kabinet ke deka datai.
Iya madahka Bahagian nya deka dibaruh Opis Menteri Pengintu Pengelantang Pendiau, Pengelantang Raban Bansa, Orang Indu, Ruang Bilik enggau Pemansang Nembiak Mit.
“Ngarapka dalam aum kabinet ke deka datai kitai ulih bejuraika siti keretas perambu bekaul enggau pengawa deka numbuhka Bahagian Pembangunan Awal Kanak-Kanak dibaruh opis menteri kami.
“Lalu dalam Bahagian tu kitai deka bisi 12 jawatan berengkah ari gred 54 ngagai diploma. Kitai ngarapka enggau penumbuh sereta 12 pegawai sereta kakitangan ulih ngenegapka Bahagian Pembangunan Awal Kanak-Kanak.
“Sebedau tu kitai semina ngena Majlis Pendidikan Awal Kanak-Kanak, tang enti udah dikemendarka kabinet ila kitai deka bisi siti Bahagian Pembangunan Awal KanakKanak,” ku iya bejaku ngagai raban pengarang berita.
Dulu ari nya Fatimah nyadi Chairman Aum Majlis Pembangunan Awak Kanak- Kanak Sarawak (MPAKS) 2/2018 ke diatur ba sebuah hotel ditu, lemai kemari.
Berebak enggau aum tu Fatimah ke nyadi Chairman MPAKS nyuaka Watikah Pelantikan Ahli-Ahli Majlis 2018-2020 ngagai 25 iku ti nyengkaum 17 iku kaban lama sereta 7 kaban baru.
Kelimpah ari nya, iya mega ngenang pasal Pelan Strategik 2018 ti fokus ngagai pengawa ngemanahka agi (penambahbaikan) pemansang nembiak mit enggau holistik ti mungkur aspek pengerai, pengelikun enggau pelajar.
Pemansang tu ku iya, nyengkaum ngemanahka infrastruktur isntitusi pelajar tumu anak mit (PAKK) sekalika di mengeri tauka di menua pesisir dikena meri peluang akses enggau ekuiti ngagai semua nembiak mit awakka ulih bulih pelajar ti bekualiti.
“Visyen kitai deka ke nembiak mit ti bepengerai, regas sereta ngembuan pengelandik baru lalu Misyen kitai deka ngenukuka pengawa nyeridi nembiak mit ti bekualiti dikena ngemansangka nembiak mit enggau holistik.
“Objektif kitai deka nempa nembiak mit ti bepengerai, regas, ceria, bersahsiah mulia, ulih berandau sereta berunding enggau kreatif sereta kritis, ulih ngatika diri, ngembuan ulah ti tegap enggau talukka menua.
Nya alai dikena nyapai nya, MPAKS dalam taun tu deka ngatur 8 aktiviti ninting taun sereta 12 aktiviti ‘One-Off’.
Entara 8 aktiviti tiap taun baka program Mencungkil Bakat dan Potensi; Konvensyen Pendidikan Prasekolah Kali Ke-12; Bengkel ‘Go Green/ BaBa (Bersih Awal dan Bersih Akhir); Pembangunan Profesionalisme Berterusan (CPD): Kajian Tindakan; Pemantauan dan Anugerah Benchmarking TASKA/TADIKA, Bengkel Modul Asuhan Kanak-Kanak Berkeperluan Khas (AKBK) enggau Kursus Kesedaran Occupational Safety and Health.
Nambahka nya aktiviti ‘ONE-off’ nyengkaum ngasilka poster/banting, nyalin Buku Panduan Asuhan Kanakkanak di Rumah ngagai Jaku Iban enggau Mandarin, Benchamarking Terbaik Dari Luar Negara enggau ke bukai.
“Program BaBa tu dikena meri penyedar ngagai nembiak mit pasal pemeresi diri, ruang bilik, raban bansa enggau rampa menua.
“Program Mencungkil Bakat dan Potensi dipelaba deka diatur kena 26-27 September di Kuching enggau juluk deka ngiga bakat tauka pengelandik nembiak mit lalu udah nya kitai mantu ngerembaika bakat tauka pengelandik sida,” ku iya ti nerangka sekeda aktiviti ke deka diatur MPAKS.
Sama bisi dalam aum pengarang berita Menteri Muda Orang Indu, Runag Bilik enggau pemansang Nembiak Mit Rosey Yunus, Sekretari Mendam Opis Menteri Dr Saadiah Abdul Samat sereta 25 kaban MPAKS ke bukai.