Peranak Sarawak meseti beserakup nyatup Petronas, ku Lukanisman
MIRI: Peranak Sarawak meseti beserakup enda ngira idealogi politik, penatai asal enggau manggaika solidariti pemadu atas dikena nentuka Sarawak menang ba peminta ari Petronas ngagai menua ngambi ngulihka hak undang-undang dikena ngintu minyak enggau pemansut gis di nengeri tu.
Kaban Parlimen (MP) Sibuti Lukanisman Awang Sauni, madahka kitai begunaka raban profesional, luyar, parti politik dikena ngulihka timbal ari semua raban ngambika begempung belalauka peminta ari Petronas dikena ngulihka hak operasyen di baruh deklarasyen PDA 1974.
“Aku ngasaika kitai patut begempung enda ngira parti politik l aban nya bekaul enggau hak peranak Sarawak ke mega disebut dalam MA63,” ku Lukanisman ngagai raban media rambau penemuai meri basa diatur Serakup Pengarang Berita Sarawak Utara (NSJA) di opis iya di Piasau kemari.
Presiden NSJA, Andy Jong mega bisi datai maya nya.
Nitih ku Lukanisman, nyadi MP ti biak, iya nerima mayuh timbal ari rayat Sarawak ti nyukung perintah nengeri ba pekara hak Peranak Sarawak enggau MA63.
Iya madahn iya diatu ngena pelasar media rama ngulihka timbal, penerang ari mensia mayuh ke alai nerima timbal manah ba isu Petronas ti engkeman enggau perintah Sarawak.
Ku iya, iya bulih mayuh likes enggau shares ari pekara dibantai pasal isu nya lalu nerima jaku timbal enggau sukung ti manah ngagai perintah BN.
Nitih ku Lukanisman, beguna amat ngagai Sarawak menang ba peminta ari Petronas laban hak minyak enggau gis nyengala disebut dalam MA63.
Ku iya, kitai peranak Sarawak enggai mekit sebarang raban tauka nengeri, tang kitai semina dekaka hak kitai dipulaika baru sereta dikunsi.
“Aku ngarapka peranak Sarawak deka nyukung nengah solidariti ngambika pemutus kort deka ngarika Sarawak,” ku iya madah nyemetak.
Berebak enggau nya, iya ngarapka perintah besai Pakatan Harapan (PH) baru ulih ngamatka semaya 20 peratus royalti minyak maya pengawa bepilih ke 14 tu ngagai rayat.