Ulah ti bebasaka pangan diri udah lama dikemeran di nengeri tu ti nyadi penyelai ke dikembuan peranak Sarawak

MIRI: Pemanah kaul enggau kerejasama pupu bansa patut ditegap ti pulaika pemaik enggau pemansang komuniti.

Kaban Kunsil Nengeri ( ADUN) Lambir, Ripin Lamat madah pemereti ati enggau ulah bebasaka pangan diri nyadi penyelai ti dikembuan peranak Sarawak ti patut ditan.

“Pemujur komuniti asil ari kaul enggau interasyen ti tegap antara sida. Pemanah kaul beguna amat dikena ngempung semua rayat bela ngaul diri ba pemansang ti diperambu,” ku iya nerang.

Ripin mansutka jaku nya lebuh pengawa nyuaka bubur kachang enggau pemeri duit raya diatur Serakup Kedayan Miri enggau Komiti Nembiak Ngatur Pengawa Kampung Luak/Lusut Miri lemai kemari.

Berindik ari nya, Ripin ti mega Presiden Kedayan Sarawak meransang komuniti Kedayan ngerembaika kaul enggau kerejasama enggau komuniti pupu bansa ditu nyadika chara mai semak agi ba budaya enggau tradisyen sida.

Kelimpah ari nya, kerejasama ba komuniti Kedayan nya empu mega beguna amat sereta ditegapka agi.

Kedayan antara peranak tumu diau mendam di Miri, di beberapa genturung pendiau iya nya Kampung Luak, Kampung Lusut, kampung Hj Wahed, Kampung Lereng Bukit, Kampung Pulau Melayu, Kampung Batu Satu Lutong.

Ngelansa pasal pengawa sehari nya, ku Ripin, kelimpah ari mantu raban ti begunaka bantu, iya mega ngempuruka komuniti Kedayan enggau pemanah kaul begulai enggau bansa bukai.

Aktiviti tu keterubah iya diatur ngaul kerejasama serakup enggau raban nembiak di kampung Luak enggau Lusut.

Serakup deka ngatur pengerami makai lemai pengasih ti diperamnu diatur ujung bulan tu, lalu deka dipenyadi Kepala Menteri Sarawak, Datuk Patinggi Abang Johari Tun Openg.

Berebak enggau nya, bisi 70 iku penerima datai ari anak patu balu, indai tunggal enggau orang tuai nerima duit raya enggau pemakai iya nya berau enggau gula ari pengatur.

Bala sida mega nerima pemakai, bubur kachang ti nyadi pemakai asal komuniti Kedayan ti disadung ngagai sida ke bisi datai rambau atur pengawa sehari nya.

Sama bisi datai, Sekretari Politik Kepala Menteri Sarawak, Sarkawi Suhaili enggau Julani Mokhtar, Pemancha Abang Mohamad Datuk Sri Abang Othman, Penghulu Samat Alip, Ketuai Raban Bansa Salim Santol enggau chairman serakup, Mohamad Abdullah.

Pemujur komuniti asil ari kaul enggau interasyen ti tegap antara sida. Pemanah kaul beguna amat dikena ngempung semua rayat bela ngaul diri ba pemansang ti diperambu. Ripin Lamat ADUN Lambir

SERURAN BEKEREJASAMA: Ripin nyuaka pemeri berau enggau gula seraya dikemata Mohd Abdullah (kiba) sereta bala temuai dipebasa bukai.

NGABANG GAWAI: Harden (duduk tengah) enggau Simba (duduk dua kiba) begambar ungkup kenang Gawai begulai enggau Tuai Rumah Ringgit (duduk kiba) enggau Blek Burong (duduk dua kanan) sereta bala pengabang bukai di Kampung Ibol, Sri Aman pagi kemari.