SUPP Dudong endang inginka Sekretari Besai parti tu diganti
SIBU: Parti Sa’ati Rayat Sarawak ( SUPP) Dudong nadai ngiga tuju nguntung ke diri ketegal ti udah mantaika penerang media ti minta Sekretari Besai SUPP Dato Sebastian Ting Chew Yew ningkilka diri ari penuduk nya.
Sapit Sekretari SUPP Dudong Dr Wong Chya Wei madahka sida enda nemu kebuah presiden parti (Datuk Dr Sim Kui Hian) meda penerang ke dibantai nya digaga ketegal bisi tuju bukai.
“Pelaba aku presiden SUPP nyangka bisi salah penemu sentang penerang ari pampang Dudong.
“Kami SUPP Dudong mantaika penemu bepun ari jaku enggau nama ke diasai rayat ditu lalu tuju iya endang ngira pemaik ngagai parti.
“Nya alai, kami enda nemu kebuah presiden madahka kami mantaika penerang nya laban ngiga penguntung diri tauka penguntung bukai,” pia ku iya madah ngagai pengarang berita maya aum media ditu, kemari.
Sebedau tu, SUPP Dudong nengah penerang sida minta Ting badu agi megai pengawa nyadi Sekretari Besai SUPP.
Peminta tu dibantaika chairman sida Wong Ching Yong, Sapit Chairman Kelvin Kong Sien Chiu, Sekretari Kong Sing Ping, Tukang Wang Daniel Sng Wei Siong enggau enggau Dr Wong.
Kebuah peminta nya digaga laban enda lantang ati meda Ting empai mansutka penerang bekaul chara enggau kuing parti nya sepengudah SUPP alah enam ari tujuh iti penuduk maya Pengawa Bepilih Besai Ke-14 (PRU14) tu tadi kelimpah enda mujur bejalaika tanggungpengawa nyadi Sekretari Besai.
Jampat nimbal penerang ari SUPP Dudong, Dr Sim ti enda senang ati meda nya madahka ulah sida lima nya enda manah sereta tampak mandangka deka ngiga penguntung diri tang ukai ngira pengelantang parti.
Nambahka jaku iya, Dr Wong bela minta Dr Sim nerang ngagai sida ba ni bagi penerang nya ti tau mai penguntung ngagai diri empu.
“Kami nadai tuju bukai tang penerang tu mandangka kami meras deka mai pemaik ngagai SUPP,” ku iya madah baru.
Ngenang penerang ti minta Ting badu megai penuduk Sekretari Besai SUPP, Dr Wong madah mega Ting enda kala ransing ngenataika diri maya bisi pengawa parti diatur di Sibu.
Taja pan pia, iya andal amat raban dalam SUPP bela gawa bendar udah tu lebih agi bepun ari pemutus ke enda manah ba Pengawa Bepilih Besai tu tadi.
“Pia mega, kami ba Dudong arap indu parti ulih ngembing kami nengah jalai ti meruan agi ngambika nemu chara ke engkeman bejalaika pengawa,” pia ku iya ngujungka randau.