Pengerami Hari Gawai Dayak richah agi diintu ba rumah panjai

KAPIT: Pengerami Gawai Dayak ti bedau lama udah diintu enggau richah ke ngayanka mayuh pengawa asal bansa Iban sereta program ti udah diatur ba rumah panjai nya ti nyadi palan besai endur ngintu pengerami tu.

Rambau pengerami Gawai tu mega enda dilengka pengawa ngabang ngagai pangan diri dikena bekunsika pengerami enggau kaban belayan.

Pengerami Gawai Dayak ti diintu kena 1 enggau 2 Jun taun tu iya nya kena ka Hari Lima enggau Hari Enam lalu tu ngujungka raban bansa Dayak bisi tiga hari berunggu enggau ngintu pengerami tu.

Enti dibanding, taun tu mayuh raban bansa Dayak pulai ari jauh tauka dampih ngagai rumah panjai sida empu ngitnu pengerami tu enggau diri sebilik nyema dibanding enggu taun nyin kemari.

Kapit ke ngembuan mayuh bansa Iban ti berumah semanjai Sungai Rajang. Bisi lebih ari 400 rumah panjai ba bagi menua tu.

Lalu majoriti bansa di kandang menua tu iya nya ngintu Gawai di rumah panjai, enda mayuh ti milih ngintu pengerami nya di mengeri.

Entara sida ti ngintu pengerami tu di rumah panjai iya nya Direktor Untang Jaya Sdn. Bhd. Puan Minor Panyau, sekretari PBB Sitak Pelagus Edward Manggah sereta sekretari Opis Kaunsil Pelilih Sri Aman Nelson Mujah. Minor ngaga pengawa nyambut pengabang di rumah iya ba Taman Indah, Jalai Selirik, lalu Edward Manggah sereta Nelson Mujah ngaga di Genturong Selirik, Jalai Selirik, ditu.

Mayuh raban ti bisi datai ngabang nyerumba Hari Gawai baka chairman SUPP Pampang Kapit Ling Thiam Ing, Ketuai Indu Gempung Foochow Kapit Anita Wong, pengempu Bayang Timur Sdn. Bhd. Ngu Teck King enggau pengarang berita The Borneo Post.

SELAMAT HARI GAWAI: Bala pengabang ba rumah Puan Minor begambar ungkup kenang.

NGABANG: Temuai ti bisi datai ngagai rumah Edward Manggah (dua kiba).

NGINTU DI MENUA: Nelson Mujah (empat kiba) nerima penatai temuai di rumah ba Jalai Selirik.