Perintah Pakatan Harapan dikearapka ulih meri pemendar ngagai projek nya ke pemaik rayat

SAMARAHAN: Menteri Muda Jalai Tebing Tasik Datuk Julaihi Narawi ngarap projek Jematan Batang Lupar ke udah dikemendar Perintah Barisan Nasional(BN) dulu agi ari tu tetap deka digaga.

Iya ngarap Perintah Besai ke baru iya nya Pakatan Harapan(PH) deka meri pemendar ngagai projek nya.

“Suba projek tu udah dikemendar lalu disetuju 50-50 entara Perintah Nengeri enggau Perintah Besai BN.

“Kitai ngarap projek Jematan Batang Lupar dikemendar perintah baru Pakatan Harapan,” ku iya dikerandau pemberita pengudah bejadi ‘laluan trafik’ Jematan Batang Samarahan ditu, kemari.

Julaihi netapka Jematan Batang Lupar seiti jematan ke stratejik ba sepemanjai jalai tebing tasik.

Jematan nya ku iya deka nentuka jalai tebing tasik ari tunga selatan nuju ke utara enda putus.

“Berindik enggau nya aku ngarap Jematan Batang Lupar tetap digaga ungkup pemaik peranak nengeri tu. Tu mih peneka rayat,” ku iya nandu.

Nitihka perambu asal perintah ke dulu iya nya BN, projek Jematan Batang Lupar ke begunaka belanja RM1 biliun deka dipungkal ba taun 2018 tu.

Jematan meraka Sungai Batang Lupar nya disadang nyadi jematan ke pemadu panjai di nengeri tu iya nya urung 5 kilometer.

Suba projek tu udah dikemendar lalu disetuju 50-50 entara Perintah Nengeri enggau Perintah Besai BN. Datuk Julaihi Narawi Menteri Muda Jalai Tebing Tasik