Projek ke dipejalaika SEB nya diatu udah manggai bungkur 95 peratus ba serata S’wak
MIRI: Sarawak Energy Berhad (SEB) deka seruran bejalaika projek Skim Bekal Kuasa Karan Alternatif Menua Pesisir Sarawak (SARES) dikena ngerumban bekal kuasa karan di kandang menua ulu.
Ketuai Pemesai Eksekutif SEB Sharbini Suhaili madahka diatu projek nya udah manggai bungkur 95 peratus di serata Sarawak.
“Tu seriris enggau juluk kami nyapai bungkur bekal kuasa karan manggai 100 peratus datai ba taun 2025,” ku iya lebuh bejaku ba program berbuka puasa begulai enggau Sarawak Energy di Masjid Darul Ehsan, Piasau kemari.
Ku Sharbini dalam bulan March tu tadi, SEB bisi mega ngelancharka beberapa unit 500kVA set janakuasa mindah kin kitu ke alai siti ari unit nya diengkah khas ungkup bagi menua Miri.
Set pemekal kuasa mindah kin kitu nyadi pemansut kuasa karan alternatif maya penanggul bekal kuasa karan tejang- gal nyadi ti disadang enggau ti enda disadang kelimpah ngemanah sereta ngenyampatka jam timbal ari SEB.
Ngelansa pasal program berbuka puasa nya, ku Sharbini, tu nyadi sebagi ari aktiviti tanggungpengawa rama korporat (CSR) ti diatur dikena nanggam kaul antara semua staf sereta bala bukai.
“Aku berasai lantang laban ulih datai begulai enggau bala temuai sereta staf gempung ngambika bela begulai berbuka puasa dikena ngerapitka agi kaul kelimpah ngerichahka pengawa nyambut mulia bulan Ramada al-Mubarak,” ku iya.
Berebak enggau program nya, iya mega bisi nyuaka pemeri ngagai masjid, surau, Ma’ahad Tahfiz enggau rumah ngintu pengelantang ngelinggi Miri.
Bala penerima datai ari Masjid An-Naim, Lutong; Masjid An-Nur, Pujut Tanjung Batu, Masjid Nur Hijrah, Pulau Melayu; Masjid Darul Ehsan, Piasau Jaya; Surau Nu- rul Hidayah, Kampung Haji Wahed; Surau Darul Hijrah, Piasau Utara; Surau Nurul Jamilun Subhi, Pujut Sungai Adong, Surau Hidayahtullah, Lereng Bukit; Surau Sinar Islam, Pulau Melayu; Biro Kebajikan enggau Anak Yatim Masjid Darul Ehsan, Piasau Jaya, Ma’ahad Tahfiz al-Quran enggau Persatuan Anak Yatim (PERYATIM).
Sama bisi datai Kaban Parlimen ( MP) Miri Dr Michael Teo, Kaban Kunsil Nengeri ( ADUN) Piasau Dato Sebastian Ting, Datuk Bandar Miri Adam Yii enggau Chairman Masjid Darul Ehsan Temenggong Abdul Rahman Fadzail.
Tu seriris enggau juluk kami nyapai bungkur bekal kuasa karan manggai 100 peratus datai ba taun 2025. Sharbini Suhaili Ketuai Pemesai Eksekutif SEB