Harden neruska pengawa ngabang Gawai ngagai kaban SUPP Simanggang
SRI AMAN: Menteri Muda Pengelantang Komuniti Sarawak, Datuk Francis Harden Hollis nampung pejalai ngabang Gawai Dayak ngagai Pengerami Nerima Pengabang Gawai siku ari kaban Parti Sa’ati Rayat Sarawak (SUPP) Pampang Simanggang, Belilie Ajah di Kampung Guntong, Sri Aman semak ditu, pagi kemari.
Pejalai nya nyadi siti ari program iya nyerumba pengerami ngintu Gawai Dayak, ngabang ngagai pengerami nerima pengabang bala ketuai raban bansa serea bala kaban SUPP di sitak dipegai iya, sitak Bepilih Kunsil Nengeri (DUN) Simanggang.
Harden lebuhka dirandau madah, pejalai baka tu ukai semina nyerumba pengerami Gawai aja, tang mega nyadi pelasar iya ngabas menua seraya betemu enggau rayat dipegai iya.
“Ke amat, aku udah ngelimpang awak diri ngabang Gawai seraya ngena awak nya betemu enggau beratika pekara ti patut digaga aku kelebih agi bekaul enggau pemansang di menua nya,” ku iya.
Bela nyempulang pejalai iya, Sapit Chairman Kaunsil Pelilih Sri Aman, Kaunselor Andar Suntai, Penghulu Tiong Chong Onn, Kaunsilor Denniel Saweng enggau Kaunsilor Waterkiller James Junit.
Sama bisi ngabang bini iya, Datin Simba Nallang enggau Ketuai Indu Parti SUPP Cawangan Simangang, Ling Siew Hung sereta bala kaban parti ke bukai. SIBU: Dikena nyaup perintah mayar utang menua, Parti Tindakan Demokratik (DAP) Sibu enggau Sungai Merah belabuh bejalaika program ngumpu turu ‘Tabung Harapan’ berengkah 17 Jun.
Chairperson pengatur program, Amy Lau madahka program nya deka belabuh ari 7 pagi nyentuk 12 tengah hari nengah pengawa bejual kupun ti diatur ba Opis DAP di palan dagang Rejang Park.
“Kupun tu dijual enggau rega RM10, RM50 enggau RM100 dikena meli barang pemakai enggau ai irup kelimpah barang bukai.
“Kitai mega bisi nyual anak patung burung kenyalang ke digelar ‘Ubah’ ti bisi sain ari pengari rayat ke berega RM100 enggau kek Hari Apai (RM100) ti meseti dibuking dulu,” pia ku iya madah ngagai pengarang berita ditu, kemari.
Sida ke deka buking dulu tauka sepunsa barang ke djual tau betelefon ngagai Wong Pak Kee nengah lumur 0138159700.
Kelimpah ari nya, sida ke deka meli kupon tau mega terus ngelawa opis parti ba Rejang Park tauka betefon ngagai lumur 084-322001.