Wan Junaidi sedia meri penerang pasal meli bilun berega RM35 juta

KUCHING: Ex- Menteri Pengeraja Asal enggau Rampa Menua, Dato Sri Wan Junaidi Tuanku Jaafar sedia meri penerang enti dipinta ba sentang atur meli bilun peninjau bansa ‘DA42MNG Diamond’ ke berega RM35 juta.

“Beri awak ngagai polis ngaga kereja sereta bejalaika pansik,” ku Wan Junaidi.

Iya mansutka penerang nya lebuh dipinta ngenang pengawa Mandal Chairman Parti Keadilan Rakyat (PKR) Sarawak See Chee How ti ngaga ripot polis sentang atur meli bilun ti diasaika iya kelalu mar.

Kaban Parlimen ( MP) Santubong nambah enti ripot pansik udah bisi, iya enggai meri sebarang penerang sentang isu nya ba media.

“Aku sedia meri penerang ke ditemu aku ba sentang atur meli bilun peninjau bansa ‘DA42MNG Diamond’ sereta perengka ke sikap ba bilun nya,” ku iya nandu.

Kemari, See ke mega Kaban Kunsil Nengeri ( ADUN) Batu Lintang ngaga ripot di Balai Polis Simpamg Tiga ditu ngambi polis sereta Opis Menteri Pengangkut bejalaika tasat.

Bilun peninjau ke digaga kompeni menua Austria nya dibeli nguna duit ari Opis Menteri Pengeraja Asal enggau Rampa Menua.

Bilun ke muat empat penuduk nya deka diberi ngagai Opis Kampung Sarawak lalu Sarawak nyadi nengeri keterubah nguna bilun ba atur matau pekara ke nyadi ba kampung.

See mega madah deka deka mai pekara nya ngagai Opis Penyeliah Penyalah Makai Suap (SPRM) kena 11 Jun (Hari Satu).

Iya madah deka nemu sekalika SPRM bisi mansik atur meli bilun peninjau ketegal pekara tu bisi udah diriput ba surat kabar ba bulan Oktober 2017.

“Nama kebuah rega bilun nya kelalu mar..? Aku bisi mansik diak rega bilun ke disikap enggau perengka ninjau ari kompeni ke sama iya nya bansa DA42 urung RM3.5 nyentuk ngagai RM6 juta aja.

“Tasat meseti digaga sekalika bisi kompeni tauka orang sesiku bisi kaul ba pengawa meli bilun tu lalu nama sempekat sida enggau perintah,”ku See lebuh dikerandau pemberita di luar balai polis pengudah tembu ngaga ripot.

Diberitaka bilun nya diatu benung diuji di ‘Malaysian Aviation Comission’ (MAVCOM) lalu deka diterima Opis Kampung Sarawak dalam timpuh ke semak.

Bilun disadang deka mantu pengawa matau ulah enchuri kayu di kampung Sarawak kelimpah matau pengeraja asal bukai.