PUSAKA benung mansik peluang industri buluh
KUCHING: Opis Pemansang Kayu Ramu Sarawak (PUSAKA) benung mansik industri buluh nyadi sebuah industri ti bisi peluang dikemansangka ba Sarawak.
Sapit Kepala Menteri, Datuk Amar Awang Tengah Ali Hasan madahka dikena nyapai juluk nya PUSAKA deka chakah agi bejalaika pansik ba mayuh macham buluh nyadi industri ke ulih dijual.
“Ba China ambika banding, bisi siti endur ti dikelala enggau nama Anji ke alai semua bandar nya udah ngasaika transformasi semina ketegal buluh.
“Buluh ukai semina dikena ngaga perabot tang mega nyengkaum lantai, kain mandi, pua sereta gari mega ulih digaga ari buluh,” ku iya.
Iya mansutka pekara nya lebuh bejaku ba pengerami nyuaka pemeri tiap taun ari PUSAKA enggau anak kompeni ngagai 61 gerem- pung pengintu pengelantang pendiau enggau gerempung ukai dikuasa perintah (NGO) ba Dewan Seminar, Wisma Sumber Alam ditu, ensana.
Awang Tengah ti mega Menteri Pemansang Mengeri enggau Pengeraja Asal Kediua madahka, Sarawak bisi peluang ngemansangka industri buluh.
Nya alai ku iya, PUASAKA deka meda baka ni sida ulih ngerembiak agi industri buluh nya.
“Kitai bisi kandang tanah ti besai endur bejalaika tu sereta mayuh agi industri bukai ti ulih kitai kemansangka kelimpah ari industri buluh enggau kayu ramu,” ku iya.
Dulu ari nya lebuh bejaku ba pengerami nya, Awang Tengah madahka PUSAKA diatu enda ulih bepanggai ngagai eksport kayu primer baka papan lapis, venir, kayu bergergaji enggau ke bukai.
“Pekara ke patut dikemekuhka kitai diatu ngenegapka industri hiliran ti berega tinggi dibandingka enggau industri huluan.
“Nya alai, kitai ngarapka sida ti bekaul enggau industri ti lebih agi piak peribit ngambika sama ngenegapka industri kayu ramu kitai lebih agi industri pemansut asil.
“Aku pechaya, industri kayu ramu ulih terus ngerembai ke lalu ulih meri penatai pemisi tinggi ngagai nengeri sereta peluang gawa ngagai rayat,” ku iya.