Dennis ngenggaika berita PBB deka ningkil diri ari BN
MIRI: Kaban Supreme Kaunsil PBB ke lalu nyadi Kaban Kunsil Nengeri ( ADUN) Telang Usan Dennis Ngau ngenggaika berita ti madahka parti megai perintah Sarawak (PBB) deka ningkilka diri ari Barisan Nasional (BN).
Ku iya, naka diatu, nadai sebarang aum tauka kelai PBB deka ningkilka diri ari parti komponen BN.
“Aku enda ngasaika pekara tu amat laban kuing PBB semina ulih diputus rambau aum Supreme Kaunsil parti kami aja,” ku Dennis madah ngagai Borneo Post nimbal pasal berita ngerimbas pending nya.
Bisi ripot ari Malaysian Insight ke alai PBB deka ningkilka diri ari BN.
Nitih ku Dennis, lalu naka diatu, presiden parti sida, Datuk Patinggi Abang Johari Tun Openg nadai berandauka isu nya dalam aum supreme kaunsil sida.
Dikena nyukung jaku iya, Dennis ke mega bisi berandau enggau Sekretari Peribit Kepala Menteri Sarawak kemari, ngenukuka nadai aum ke baka nya diatur presiden PBB, Abang Johari enggau Pemangku Ketuai Barisan Nasional (BN) Datuk Seri Ahmad Zahid Hamidi.
Parti besai Sarawak bisi 13 penuduk parlimen lalu udah nyadi kuasa undi ngagai BN.
PBB iya nya komponen kedua pemadu besai ngagai BN.
Seraya meresa ngagai indu opis PBB di Kuching ari Ketuai Pampang PBB ditu ngenuku sekalika berita nya bula tauka amat.
Ketuai pampang PBB dipadahka pengari Indu Opis PBB madahka agi nganti Kepala Menteri Sarawak mantaika penerang rasmi enti berita nya bula tauka amat.