Tu inisiatif deka dipejalaika Opis Menteri PBT enggau Pengawa Berumah bepun ari mengeri enggau kaunsil mengeri
SIBU: Opis Menteri Kaunsil Kandang Menua (PBT) enggau Pengawa Berumah nguji bejalaika inisiatif gadung ba pengawa nagang bekenaka kambut plastik berenggat berengkah ari mengeri enggau kaunsil mengeri.
Menteri Muda Kaunsil Kandang Menua, Datu Dr Penguang Manggil (gambar) mansutka jaku nya lebuhka ditanya sekalika opis menteri nya bisi perambu dikena meransang raban kaunsil mengeri ke bukai di nengeri tu nunda pengawa Majlis Perbandaran Sibu (MPS) ti udah bejalaika pengawa nya.
Kenyau ari pejalai kimpin ‘Katakan Tidak Pada Beg Plastik 2.0’ kena 1 Januari 2018, premis dagang ditu badu agi nyediaka pelanggan enggau kambut plastik nadai bebayar.
Berindik ari pekara nya, ku Penguang, raban sida nguji bejalaika inisiatif nya berenggat berengkah di mengeri
Tanggungpengawa ngintu rampa menua nyadi tanggpengawa begulai lalu nya kebuah kitai meseti ngemeranka runding kelas satu. Datu Dr Penguang Manggil Menteri Muda Kaunsil Kandang Menua
besai enggau kaunsil mengeri bukai. Kaunsil mengeri menua ti mit agi diperansang nunda pengawa nya.
Kaban Kunsil Nengeri (ADUN) Marudi nya seruran pechaya pun pekara disiplin diri nyadi kunchi besai nentuka pemujur sebarang kimpin baka “tiada beg plastik”.
“Tanggungpengawa ngintu rampa menua nyadi tanggpengawa begulai lalu nya kebuah kitai meseti ngemeranka runding kelas satu.
“Kelimpah ari nya, pelajar enda formal dikena ngubah ulah rayat kitai ngambika enda bekenaka kambut plastik tauka nyeliah ari bekenaka kambut plastik iya nya kritikal amat. Iya mudah agi digaga diatu sebedau kelalu laun,” ku iya madah nyemetak.
Belalauka pansik dipejalai dalam taun 2010 di indu mengeri di Sarawak, komposisyen teda iya nya pemakai jampat luluh (35 peratus), keretas (19 peratus), plastik lemi (11 peratus), plastik keras (lima peratus), sisa taman (lima peratus) lampin pakai buang (lima peratus), kacha (tiga peratus), kayu (dua peratus) enggau ke bukai iya nya teda ari logam enggau ramu berumah.
Sahabat Alam Malaysia (SAM) mega udah mantaika pinta ke sama ngemunaska pengawa bekenaka plastik.
Beserimbai enggau pengawa ngintu Hari Tasik Sedunya, SAM dipadah minta ngambi ngemunaska pengawa bekenaka plastik tunggal nyadi pengawa keterubah dikena nagang ulah ngamahka rampa menua ari kambut plastik ti dibuai.