Pengerami Pemakai Menua diatur enam NGO Dayak di Krian mujur
KUCHING: Pengerami Pemakai Menua 2018 udah mujur diatur Balai St Jerome, Kaki Wong, Krian kena 26 Mei tu tadi lalu udah dipenyadika Nicholas Bawin Anggat, siku aktivis rama kelebih agi ba pekara tanah Adat Bansa Asal (NCR) menua tu.
Nitih ku Sekretari pengatur pengerami, Andrew Paul, bisi lima batang tuju atur pengerami sehari nya, kelimpah ari ngempung sereta ngempuru raban ari gempung ukai dikuasa perintah (NGO) Dayak bukai sereta sida ti ngatika diri berami ngaul pangan diri nyerumba pengawa bejadika SADIA Pampang Krian kena 27 Mei.
Tuju kesatu ku Andrew, ari sukut bansa iya nya dikena nempa kelai kitai bansa Iban ngambika dikelala enggau ditemu orang nama pemakai asal kitai. Kitai bansa Iban sebaka enggau bansa bukai di menua tu, ngembuan pemakai asal sekalika ari bulu babas tauka jelu kampung. Chara kitai nyediaka pemakai mega bisi bida ari bansa bukai.
Kedua iya, ari atur pekit Manduk Lauk Pemakai Menua tu tau diatur kitai ninting taun lalu ukai ngemeratka siti nalan aja, tang mega mungkur semua bagi menua kitai di Sarawak ditu.
“Ari pekit tu, kitai mega ulih mai rebak baru belajar nyumai tauka bepengelandik manduk bansa pemakai asal kitai di rumah panjai. Reti iya, pemakai tu deka meruan bisi dataika jemah.
“Nya alai, besai amat pengarap kitai ditu sehari tu ngambika bala di bagi menua bukai mega bela deka ngatur pengerami baka tu dudi hari ba menua sida empu,” ku Andrew.
Tuju ketiga, nangkup peminta ba dagang pemakai iya nya Set Menu Pemakai Menua, barang sapa ke bisi ati bedagang ulih nyual pemakai tu, ba sebarang alai. Tambah mega, raban NGO Dayak mega deka nyaup pengawa ngelakuka Pemakai Menua tu.
“Ari atur pengerami tu mega kitai ulih ngiga belanja enti kitai bagas begigaka lauk babas, dikemisi kitai dalam bungkur Pemakai Menua.”
Ba sukut penatai pemisi ku Andrew, enti Set Menu Pemakai Menua udah ditemu sereta dikerindu bala mayuh, sida ti bedaja bulu babas baka daun empasa, ensabi, upa pantu enggau ke bukai, ulih nambahka belanja ba ruang bilik sida. Bulu babas tu mega tau dikelaku ngambika dijual ngagai palan bebelika barang di mengeri ke alai kitai di rumah panjai nyadi ‘pemekal’.
Tuju kepenudi iya nya ari sukut kaul serakup bansa ke alai pengerami tu tau nyadi pelasar ngagai raban NGO Dayak begempuru sereta begulai berami enggau pangan diri, datai ari jauh tauka semak.
“Nya alai, pengerami tu dikearap ulih meri peransang ngagai penyerakup antara raban NGO di menua tu,” ku Paul nyimpul jaku.
Ngelansa pasal Pekit Manduk Pemakai Menua ke diatur sehari nya, dua bansa pemakai asal ti dipekit iya nya manduk Jani Guring Iban enggau Daun Empasa/ Jabang/ Ubi Guring lalu bisi lapan tim udah nyereta pekit nya.
Tim Bukit Tabujang Sinu Ngenang menggi gelar champion nerima perais mata duit penyampau RM500, lumur dua tim Ruai Indai (RCD) nerima RM300 lalu penuduk ketiga dipenggi tim Kaki Wong nerima perais mata duit RM200.
Pengerami tu diatur begulai enam NGO Dayak iya nya Saratok Update, SADIA-Krian, Serakup Dayak Sarawak (PEDAS), Dayak Gempuru (DG), Dayak Think-Tank Group ( DTTG) Kuching enggau Ruai Cyber Dayak (RCD).
Sama bisi mansutka jaku rambau atur pengerami nya, Mandal Presiden II PEDAS, Victor Ason ke lalu nyadi Chairman Komiti Pengatur enggau temuai dipebasa, Nicholas Bawin.
Victor Ason dalam jaku dipansutka berasai temegah ati ari timbal sereta pemanah atur pengerami ti keterubah diatur seraya ngarapka kaul ke bisi ditanggam antara raban NGO Dayak sehari nya meruan ditan sereta dikemeran ba se- barang atur program enggau pengerami dudi hari.
“Ukai semina pengawa lantang aja kitai bansa Dayak patut begempung, pengawa ti berat sereta besai pangka kelebih agi ba tanah NCR mega begunaka saup enggau sukung ari semua.
“Nya alai, aku endang meransang semua kitai ke bisi ditu, nusi enggau nampung jaku kenang sereta tuju pengerami kitai ditu, ngagai diri sebilik, kaban belayan, bala bakih enggau bala bukai, nentuka kitai bansa terus beserakup sereta nyukung ni bagi pengawa ti negika hak enggau bansa kitai,” ku Victor madah nyemetak.
Nicholas Bawin mega sepenemu enggau bala komiti pengatur pengerami ke alai leka jaku Pemakai Menua ngemai reti chukup besai ngagai kitai bansa Iban, sekalika ba pekara pemakai tauka tanah.
Ku iya, Pemakai Menua tu endang dipenggi aki ini kitai ari menya, berimbaka kampung, beridup sereta nirika temawai enggau temuda.
“Nya alai, jaku Pemakai Menua tu chukup semak ba ati semua kitai.”
Kenang pengerami manis agi enggau penatai Kaban Par- limen (MP) Saratok, Ali Biju, ke lalu nyadi Kaban Kunsil Nengeri (ADUN) Krian.
Muakka malam bala ke bisi datai beperindang enggau siku penyanyi Iban tebilang kemaya hari, Mark Benet, enggau lagu Asal Jadi.