Pejalai kapal tejanggal ngujungka penanggul suntuk minyak di Kapit
KAPIT: Sida ti ngempu entukar di pasar Kapit nyentuk ulu Batang Rajang suah amat betapi enggau pemar suntuk bekal minyak.
Rambau pengerami Gawai tu tadi, penguna minyak entukar di Kapit betapi penanggul suntuk bekal semua bansa minyak, diesel, kerosin enggau petrol.
Penerang ari Opis Menteri Dagang Dalam Menua, Koperasi enggau Orang Bebelika Barang ( KPDNKK) Kapit madahka kebuah penanggul nyadi ketegal kapal ti nganjung minyak ari Gudang Petronas ari Tanjung Manis ngagai Kapit ti tejanggal.
Nitih baka selama, sekali pejalai nganjung pengelama seminggu meri bekal minyak ngagai Ngemah, Song enggau Kapit. Ngetu di Ngemah ngambika ngisi tangki udah nya dianjung ngagai Song lalu kepenudi sangkai di Kapit. Begunaka timpuh enam hari endur nembuka pejalai.
Pengawa bekenaka minyak ari Stesyen Petronas purata dalam sebulan 430,000 liter seraya diesel urung 950,000 liter.
Kapit bisi tujuh ngagai lapan ribu entukar ti rejista.
Penyampau ti diguna nyangka dua kali lipat laban dua stesyen min- yak di pasar, di sepanjai Jalai Tebing Kapit.
Dua stesyen minyak di Kapit iya nya sebuah ejen Petronas seraya sebuah agi diempu orang bukai. Lalu bisi tiga kedai minyak melepung di tebing sungai Kapit ti meri servis ngagai bot.
Siku ari pengguna ti udah pinchin, Justin Jaman, lebuhka dirandau ba stesyen minyak madahka diri asa laban suah suntuk bekal minyak ngujungka rayat napi penanggul.
“Penanggul suntuk bekal minyak ditu ukai isu ti baru nyadi kemari. Penanggul tu suah nyadi ngelama tu. Bisi beribu entukar betengahka jalai tang di Kapit tu semina bisi dua stesyen minyak aja.
“Endang enda chukup. Kami seruran napi penanggul suntuk minyak,” ku Justin, ex- pengajar.
“Dulu suba, lebuh Perintah BN, kitai napi penanggul suntuk minyak. Diatu kitai bisi perintah baru, lalu nadai insur. Kitai ngarapka Perintah Pakatan Harapan ( PH) deka beratika peminta enggau peneka rayat.
“Opis Perengka Pengangkut Darat ( JPJ) ngambi bayar chukai jalai lalu kami mayar insuran, perintah patut beratika penanggul suntuk bekal minyak ti ditapi kitai,” ku Justin nambah.