Gerija Anglika napi pemar narit penyereta orang biak

KUCHING: Gerija Anglika diatu betapi enggau pemar deka narit baru penyereta raban nembiak dalam aktiviti enggau servis gereja.

Uskup Gereja Anglika ba Sarawak enggau Brunei, Rt Rev Danald Jute madahka pengawa narit mayuh agi raban nembiak ngambika chakah agi dalam gerija ukai pengawa muntang.

“Kitai enda ulih ngenggaika iya nya tebal agi gerija ke bisi nya endang nadai ngatur aktiviti ungkup raban nembiak.

“Tu mega kebuah raban nembiak kitai majak jauh ari aktiviti enggau servis gereja,” ku iya dalam Forum Ulang Tahun Ke-170 Gerija Anglikan ba sebuah hotel ditu, ensana.

Danal bejaku baru, ketegal iring ti enda chukup ungkup raban nembiak ari gereja ba endur diri empu, ngujungka raban tu deka leju.

“Kitai semina ngelemika kitai empu aja, raban biak nyengkaum Tuhan,” ku Danald ti irauka gaya Gerija Anglika jemah ila.

Nya alai iya mai semua gereja lebih agi 40 buah gereja Anglika di Sarawak enggau Brunei meda pekara nya sereta ngiga jalai bakani ulih narit baru nembiak semak enggau Tuhan.

“Semua kitai bisi peranan deka dipejalaika sereta seruran ingat gawa nyadi siti tim,” ku iya bejaku ba lebih 1,000 delegasi ke datai ngulu forum nya.

Kelimpah ari nya, Rev Andrew Shie ari Brunei madahka tuju gereja iya nya ngibun rayat ari anak mit nyentuk tuai tang raban biak pemadu di fokus kemaya hari tu.

“Pengudah raban biak ngelui renggat betetap ba gereja, sida tusah amat dipeda ba gerija nyengkaum maya sembiang Misa Hari Minggu,” ku iya.

Berindik ari nya Andrew minta piak gereja ngambika ngena chara ti lebih manah dalam pengawa ngiring raban nembiak awakka terus regas dalam gereja.

Kelimpah ari nya, apai indai ku iya mega patut bejalaika tanggungpengawa sida dalam ngiring anak sida ngambika enda limpang ari ajar gereja.