Nengeri S’wak randa mayuh agi pengari rayat ba kabinet
SIBU: Nengeri Sarawak randa mayuh agi pengari ba kabinet ti bela dikena ngelai manifesto Pakatan Harapan (PH) mujur nentuka reformasyen struktural enggau chara megai menua ke manah bepelasarka Sempekat Malaysia 1963 (MA63) enggau Konstitusyen Perintah Besai.
Dayak Think- Tank Group ( DTTG) meda pekara nya beguna bendar ba atur nentuka nengeri tu enda tinggal pemansang besai menua.
“Manifesto PH mungkur meri autonomi ba pekara pelajar, pengerai enggau fiskal ke Sarawak ti bela meri hak nengeri tu nitihka MA63.
“Nya alai, bepanggai ba pengelandik pemesai ba tikas pemadu tinggi dalam PH milih sapa pengari ari nengeri tu nyadi kaban kabinet perintah menua.
“Tang kitai enda lantang ati nyema pengari ari Sarawak lebih agi bansa Dayak enda dikeibuhka laban bansa tu enda kala enda dipilih enggau nyadi raban kabinet kenyau ari menua Malaysia ditumbuh kena 16 September 1963,” pia ku penengkebang DTTG, Wellie Henry Majang madah ngagai pengarang berita, kemari.
Ba tuju ke sebaka, ku iya, DTTG andal amat sebengkah opis baka Jabatan Hal Ehwal Sabah Sarawak ulih ditumbuh ngambika nyadi platform dikena nyaga sereta ngintu hak orang asal.
Iya madah, enda milih dipilih nyadi menteri tauka sapit menteri, portfolio nya deka nyadi penuduk ti engkeman ngagai nengeri tu bepun ari pemanah servis gawa nyadi pengari rayat ba ditu sebedau tu.
“Ditu kitai pechaya Kaban Parlimen Saratok, Ali Biju, siku pengari ti engkeman diberi portfolio ba kabinet perintah besai laban sebedau tu iya mujur mandangka diri bejalai tanggungpengawa enggau manah sekumbang ke nyadi ADUN Krian.
“Enti diperati enggau pemujur iya sebedau tu, Ali tau disebut ‘The Giant Killer’ sepengudah mujur ngalahka siku orang ‘besai’ ba politik iya nya Datuk Peter Nyarok (Barisan Nasional/BN) maya Pengawa Bepilih Nengeri ( PRN) Ke- 10 ba DUN Krian sereta nadai penanggul ngetanka penuduk nya baru ba PRN11.
“Ali sekali agi mandangka diri ‘kering’ ba politik nengeri Sarawak, maya iya ngalahka Subeng Mula (BN) ba PRU14 tu tadi lalu dipilih rayat nyadi Kaban Parlimen Saratok,” ku iya madah baru.
Berita minggu siti tadi mantaika nama Ali, siku ari Kaban Parlimen nengeri tu nyangka dipilih nyadi siku ari kabinet perintah besai.
Ali, 50, ngembuan pelajar ari Universiti Valparaiso, Indiana, Amerika Syarikat diatu bisi kompeni diri empu ba pengawa industri minyak enggau gis.