CUEPACS nyukung polisi pemesai pangkat tinggi patut ngambi peresa kompentesi BI
KUCHING: Kongres Serakup Pengereja Pengawa Opis Perintah (CUEPACS) Nengeri Sarawak ( CNS) nyukung polisi ti dipejalaika Menteri Besai Tun Dr. Mahathir Mohamad ti deka ke pemesai bepangkat tinggi opis perintah ngambi peresa kompentensi Jaku English (BI).
Chairman CNS, Ahmad Malie madahka laban tuju nya manah ti deka ngenukuka kompetensi BI pengereja pengawa lebih agi pegawai tinggi dalam opis perintah ba tikas ke manah.
“CNS nyukung polisi tu laban nyadi pegawai tinggi opis perintah sida enggau lansung deka suah betemu, berandau sereta baum enggau pegawai tinggi ari menua tasik.
“Maya nya, udah tentu BI deka dikena sida berandau, lalu berebak enggau tu ulih ngayankan pegawai tinggi kitai orang ti ulih bejaku BI enggau lebih manah,” ku iya madah ngagai Utusan Borneo.
Ahmad ngarika CNS meri penemu nya lebuh dipinta meri penerang bekaul enggau Menteri Besai Tun Dr Mahathir Mohamad ba aum pengarang berita pengudah baum kabinet apin lama di Petaling Jaya, madahka peresa tauka ujian kompetensi BI deka dipejalaika ungkup pegawai tinggi opis perintah.
Tun Mahathir madahka BI nya amat beguna lalu enda tau enda dikemeran sereta dikemeratka pegawai tinggi opis perintah.
Berindik ari pekara nya, Ahmad ti ngarika CNS ngarapka semua pegawai tinggi opis perintah ulih nerima enggau ati tebuka polisi nya.
Lalu ku iya, nyema agi bedau landik tauka bepenemu mayuh dalam BI, patut bebendar agi ngemanahka BI ti mega ulih nyadi elemen dikena ngemanahka agi diri empu.
Kelimpah ari nya CNS beterima kasih ngagai Kepala Menteri Datuk Patinggi Abang Johari Tun Openg ti deka meri bantu khas Aidilfitri ngagai pengereja pengawa opis perintah Nengeri Sarawak apin lama, ku Ahmad.
“CNS nyambut manah sereta beterima kasih ngagai YAB Kepala Menteri Datuk Patinggi Abang Johari ti madahka deka meri bantu khas Aidilfitri sepenyampau RM500 ngagai semua pengereja pengawa opis perintah Nengeri Sarawak.
“Pekara ke dibantaika Kepala Menteri nya nunjukka perintah Sarawak amat ibuh sereta beratka pengereja pengawa opis perintah ti deka nyikap diri sereta besedia ngerami Aidilfitri,” ku iya.
Bantu khas Aidilfitri sepenyampau RM500 deka diberi ngagai semua pengereja pengawa opis perintah Nengeri Sarawak, baka ti dipadahka bantu nya deka dibayar kena 13 Jun tu ila.