Perintah Sarawak kala madah deka meri kerejasama ngagai perintah Pakatan Harapan
KUCHING: Perintah Nengeri Sarawak dipinta nitihka singkang perintah besai ke baru iya nya Pakatan Harapan(PH) ke alai semua menteri deka mantaika reta diri.
Pinta nya dikenatai Chairman PH ke mega Chairman DAP Sarawak Chong Chieng Jen.
“Aku minta Perintah Sarawak (sekalika sida agi dalam Barisan Nasional tauka udah ningkilka diri) nitihka singkang PH.
“Ketegal Abang Johari udah madah deka meri sukung ngagai Perintah Besai iya nya Pakatan Harapan, sida patut nitihka polisi tu,”ku Chong.
Iya mansutka jaku nya ba aum pengarang berita di Indu Opis DAP ditu, kenari.
Nambahka nya ku Chong, perintah Sarawak mega madah diak parti sida deka meri kerejasama ngagai PH.
“Berindik enggau nya sida patut nitihka polisi tu kelebih agi dikena nentu atur merintah ti lurus bepelasarka prinsipal landik, ulih dikearap sereta tebuka,”ku iya.
Menteri Besai Tun Dr Mahathir bedau lama tu tadi udah minta semua menteri , sapit menteri enggau pemesai tinggi perintah mantaika reta ngagai iya.
Chairman PH nya madah semua penerang ke bekaul enggau reta nya deka diberi ngagai ijinsi ke bekait enggau pengawa nyeliah penyalah makai suap.
Ketegal Abang Johari udah madah deka meri sukung ngagai Perintah Besai iya nya Pakatan Harapan, sida patut nitihka polisi tu. Chong Chieng Jen Chairman PH Sarawak