Presiden SUPP ngenuku diri deka ngulu aum BN Sarawak

KUCHING: Presiden Parti Rakyat Bersatu Sarawak (SUPP), Datuk Dr Sim Kui Hian madah iya deka ngulu aum entara empat parti dalam gempung Barisan Nasional (BN) Sarawak kena Hari Dua tu.

Kelimpah Dr Sim, sapit iya Datuk Seri Richard Riot Jaem bela dikangau datai ngulu aum nya sereta Sekretari Besai SUPP, Dato Sebastian Ting.

“Kami enda nemu tuju ke endar aum diatur tang semua presiden nyengkaum sapit presiden sereta sekretari besai parti dalam gempung BN meseti datai.

“Aku enda nemu sekalika sapit aku(Riot) deka datai ngulu aum nya, tang aku nguji nentuka ke- tetiga kami datai,”ku iya.

Iya mansutka penerang nya lebuh dikerandau pemberita pengudah nyuaka cek geran ngagai mayuh bengkah gerempung enggau komiti di Indu Opis SUPP ditu, kemari.

Dr Sim enda madahka tuju aum nya sereta isu ti deka dikerandau entara bala ketuai ari empat parti.

“Aku empu enda tentu nemu pekara ti deka dipejurai ba aum nya. Aku deka madahka kita pengudah aum nya,”ku iya.

Tajapan enda madahka tuju aum diatur, diberita entara pekara ti deka dikerandau iya nya sentang kuing BN Sarawak udah tu.

Pekara nya berat pengudah BN alah ba Pengawa Bepilih Besai Ke-14(PRU14) lalu ngujungka Pakatan Harapan numbuhka perintah baru.

Aum nya deka diuluka Kepala Menteri Datuk Patinggi Abang Johari Tun Openg ke nyadi Chairman BN Sarawak sereta Presiden Parti Pesaka Bumiputera Bersatu (PBB).

Presiden Parti Rakyat Sarawak (PRS), Tan Sri James Masing enggau Presiden Parti Demokratik Progresif (PDP), Datuk Seri Tiong King Sing sereta sapit enggau sekretari mega meseti datai ngulu aum nya.