Formadat minta atur setipikit kayu ramu dikemanah agi
KUCHING: Gempung Peranak Asal di Tanah Tinggi Borneo (Formadat) enggau bala kaban Komiti Pengari Komuniti (CRC) ari Long Semadoh enggau Ba’ Kelalan udah nyuaka memorandum ngagai Opis Kampung Sarawak, minta ngenamaka komuniti ti manah agi dalam atur setipikit kayu ramu.
Memorandum udah disua ngagai Direktor Opis Kampung Sarawak, Hamden Mohammad dalam pun minggu tu tadi rambau pejalai gawa, nitih ku penerang berita ti dikeluar kemari.
Kena 4 enggau 7 Jun, raban Formadat ari Bario, Ba’ Kelalan enggau Long Semadoh ti diketuaika chairman nasional sida, Penghulu George Sigar udah nerima meri basa ngagai mayuh bengkah opis perintah enggau raban berkepentingan di Sarawak.
Raban nya mega disempulang pemesai WWF-Malaysia Senior Community Engagement and Education, Alicia Ng enggau pemesai Pelajar enggau Komuniti, Henrita Samuel.
Dalam memorandum nya, bala komuniti ngansak raban opis baka chairman Komiti Kanan Komuniti Ngatur Kemampanan Kampung ngambika terus bisi kaul enggau ngaul CRC nyadi pelasar komuniti chakah gawa ngemai pinta peranak ngagai kompeni batang ti gawa dalam kandang menua, lalu ngelala pangku pengawa CRC lebuh beratika isu ungkup komuniti menua nya.
Bala pengari komuniti ke diau dalam tauka besepiak enggau konsesi batang baka CRC iya nya sebagi ari peminta ungkup pengawa ngintu kemampanan kampung enggau pensijilan di Sarawak.
Memorandum nya mega nyemetak madahka pemesai guna raban kompeni batang ba pengawa ngenukuka CRC nyadi sambung komunikasyen beguna amat ti nyambung bala komuniti menua nya ngagai sida ti megai lisin isu bekaul enggau pengawa ngintu kampung lestari, enggau dikena meri sukung ba aktiviti nyaga sungai baka program ngambu sungai.
Antara taun 2015 enggau 2016, Formadat udah ngelai lalu nanda kesemua 71 batang sungai ti dikelala di Long Semadoh ungkup program ambu enggau pengarap kandang menua tu ulih dipasuk ke dalam pelin ngintu kampung nyadika kandang menua ti diintu.
Bala komuniti minta opis ngambika ngaku inisiatif ti dipe- jalai bala komuniti menua nya ba pengawa ngaga kar kandang menua komuniti beguna amat ti dikena ari kereja rat enggau CRC sereta ngaku bahan ti dipansutka Formadat baka kar, nyadi chuan penerang rasmi ngagai atur pejalai setipikit.
Formadat iya nya trans-boundary, inisiatig pun menua ke alai tuju iya deka nambahka penyedar enggau pemereti ati bala komuniti di tanah tinggi, ngetanka gaya idup asal, nempa kapasiti peranak menua nya, enggau meransang pemansang tegap dalam Kandang Tengah Menua Borneo (HoB) enggau nadai ngeruga pengelenyau kualiti rama enggau rampa menua asal.
Kelimpah ari nemuai ngagai Opis Kampung Sarawak, bala komuniti nya mega ngena awak nya betemu enggau Sapit Speaker Aum Kunsil Nengeri (DUN) enggau Kaban Kunsil Nengeri (ADUN) Mulu, Dato Gerawat Gala, ADUN Ba’ Kelalan enggau Kaban Parlimen (MP) Selangau Baru Bian sereta Direktor Social Informatics and Technological Innovations of Universiti Malaysia Sarawak (Unimas) Professor Dr Narayanan N. Kulathu Ramaiyer minta saup enggau sukung ungkup Formadat.