Bekal kuasa karan di Kanowit dipatau SEB
KUCHING: Sarawak Energy Berhad (SEB) udah matau gaya bekal kuasa karan ngagai Kanowit enggau semak agi lalu sebarang atur pengawa enggau penanggul ditapi bekaul enggau bekal kuasa ngagai kandang menua nya deka diputar jampat.
Tu nyengkaum nginsil kunteriktor ti diberi kuasa netak enggau nyarau dan ti nekul tali karan dalam bulan April tu tadi enggau nyiri baru kunteriktor ke baru kena bulan Mei taun tu.
Pengawa nyarau dan kayu patut seruran dipejalai lalu ngetuka bekal kuasa karan enda lama ungkup pengawa nya enti bisi pematut dikena nentuka pengelikun.
SEB minta ampun ngagai sida ke diau di Kanowit laban bekal kuasa karan suah tejanggal ungkup pengawa nya.
Kelimpah ari nya pengawa nyarau dan, SEB mega bejalaika sistem kereja neritka atur dikena nambahka pengandal bekal kuasa karan ari Sibu-Kanowit-Nibong TadaMachan (70 kilometer).
Tali karan ti udah disambung di Nibong Tada berengakh ari Kanowit ngagai stesyen mit Mapai udah tembu kena 18 Mei sebedau pengerami Gawai nyadi.
Projek tu dipelaba beungkus RM500,000 iya nya pengawa dikena nambahka pemanah sambung karan enggau nyediaka pemansut bekal tambah lalu ngurangka penyampau tubuh sida ti kena pangka.
Rekod SEB nunjukka bisi kurang agi penanggul tejanggal kuasa karan pengudah kereja nya dipejalai.
Berengkah ari tengan bulan Mei, bisi empat rikot bekal kuasa karan tejanggal ketegal pangka nyitar, entukar nge- lantak tiang api enggau kabut balat lalu begunaka timpuh antara 30 minit nyentuk 2 jam dikena mulaika baru bekal kuasa karan.
Projek udah tu beungkus RM630,000 dikena nyambung bekal kuasa karan ngagai Kanowit dipelaba tembu ujung bulan Julai tu.
Pejalai projek tu dikena nambahka agi bekal tambah ngagai Kanowit, Machan, enggau kandang menua ngelinggi iya.
Seraya kereja ngaga litar kedua benung dipejalai, SEB deka mantau semak agi enti sema bisi bekal kuasa karan tejanggal nyadi.
Raban sida meri pengandal ngagai peranak menua ti kena pangka ke alai SEB endang berat sereta berumban gawa ngemanah sereta ngangkatka pemanah bekal kuasa karan ungkup peranak di Kanowit.