Geran ke udah diagih ngagai NGO patut dikena enggau manah: Dr Sim

KUCHING: Serakup, gerempung sereta gerempung ke ukai dikuasa ulih Perintah (NGO) di menua tu dikarapla ulih majakka pemanah pengawa sida iya ngagai rayat enggau menua tu.

Menteri Opis Kandang Menua enggau Pengawa Berumah, Datuk Dr Sim Kui Hian madah tetiap gerempunmg enggau NGO di menua tu meri nengah chara ke enda sebaka ngagai rayat enggau menua tu.

“Di Sarawak, kitai bisi urung 5,000 buah gerempung enggau NGO nyengkaum bemacham komiti bejalaika pengawa ngagai komuniti.

“Nya alai, kami ngarapka semua gerempung enggau NGO tu deka majakka pengawa sida ngaga kereja ke manah ngagai komuniti di menua tu.

“Ba piak Perintah Menua, kami deka majakka pengawa kami ngiga chara ke pengabis manah mantu semua gerempung enggau NGO tu,” ku iya.

Iya madah munyi nya lebuh bejaku ba atur pengawa nyuaka cek ngagai 35 penerima ke datai ari mayuh gerempung enggau NGO di Indu Opis SUPP ditu, kemari.

Lebuh bejaku pasal geran nya, Dr Sim ti mega nyadi Presiden SUPP enggau Kaban Kunsil Nengeri ( ADUN) Batu Kawa madahka geran nya pemeri ke mit kena mantu gerempung sereta NGO bejalaika pengawa sida iya.

Iya mega ngarapka geran nya deka dikena ke tuju baka ke dipinta sida iya dalam peminta ngulihka geran nya.

Dalam atur pengawa nya mega, Dr Sim madah naka kediatu, iya udah nyuaka urung ngagai 961 gerempung enggau NGO nyengkaum bemacham komiti.

Penyampau geran ke diterima ulih tetiap gerempung enda sebaka laban nitihka pemerat tuju gerempung tauka serakup nya empu.