Kelab Lions meri cheremin mata ngagai 15 nembiak SK Tanjong Bako
KUCHING: Lima belas iku nembiak sekula ari Sekula Primari (SK) Tanjong Bako diatu ulih meda enggau manah lebuh sida iya nerima cheremin mata ke dispunsa sereta dianjung ulih Kelab Lions ari sitak 308 A-2.
Kontingen Lions digulu ulih chairman Region 1, Kapitan Chong Nam Fah ke nganjung cheremin mata ngagai sekula nya kena hari Empat tu tadi.
Lalu tu ditangkan enggau meresa mata sida iya ti digaga ulih Eyework Group Optical (M) Sdn. Bhd. maya Region 1 Lions Service Day – iya nya Projek Komuniti ti digaga di sekula nya kena 26 Mei ke nyengkaum SightFirst.
Lima belas iku penerima nya entara 50 iku bala nembiak ke bisi diperesa hari nya.
Sebedau sida iya diperesa, lima belas iku nembiak nya nadai ngena cheremin mata, lalu mata sida iya pan enda berapa lansik.
Kelab Lions ba siti penerang madahka sekeda penerima nya ngembuan ‘lazy eye’ (sebansa penyakit mata) alai siti ari mata sida iya enda mansang enggau manah. Ngembuan mata ke manah siti pekara ke berat ba semua sukut pendiau nembiak.
Lebuh nembiak enda ulih meda enggau mana, sida iya pan enda ulih ngereja pengawa sida iya enggau manah baik nya ari sukut akademik tauka ko-kurikular sida iya.
Bechuntoka siti pansik, iya madah penanggul ulih meda tauka enda tau ngachau pengulih nembiak nya belajar enggau manah, lalu nambah enggau nya mandangka urung 60 peratus nembiak ditemu bisi penanggul belajar ke enda ditemu sida iya.
Kelimpah ari sekula, 35 ari mensia mayuh di genturung pendiau di Tanjong Bako mega bisi diberi cheremin mata kena macha, ke bel dispunsa ulih Kelab Lions, Serian.