Mayuh agi NGO dikearap ngatur aktiviti ke pengelantang pendiau komuniti

MIRI: Sebuah Gerempung Ukai Dikuasa Perintah (NGO) ditu, Miri Chee Lee Khor Moral Uplifting Society udah mantaika chunto manah ba pengawa nerenakka penyerakup enggau pengelantang sentang jalai pengarap di nengeri tu.

Kaban Parlimen ( MP) Sibuti Lukanisman Awang Sauni meransang mayuh agi NGO mansang ke mua enggau ngatur aktiviti ti nambahka pengelantang bala komuniti.

“Miri Che Lee Khor Moral Uplifting Society udah dikelala enggau kereja ngintu pengelantang rama sida kelebih agi di mengeri nengah program nyadung pemeri musim pengerami ninting taun, maya pengerami Taun Baru China (CNY), Gawai Dayak enggau Hari Raya Aidilfitri.

“Program tu dilangkar kelebih agi dikena mantu raban begunaka bantu kelebih agi sida datai ari ruang bilik seranta ti deka ngintu hari besai,” ku iya lebuh bejadika Pemeri Hari Raya di palan gempung kemari.

Nengah program tu, Lukanisman nyemetak madahka gempung ulih ngenataika diri ngagai bala komuniti nadai ngira bansa enggau pengarap.

“Gempung tu iya nya kelai penyakup bukai di Sarawak. Aku ngarapka bala bukai deka nunda pemanah semangat ti udah diayanka gempung tu.”

Nya alai iya dekaka gem- pung nya nampung program ti ngemai reti ngagai program ngintu pengelantang ke bisi dipejalaika perintah baka opis pengintu pengelantang enggau Tabung Baitumal Sarawak (TBS).

Berebak enggau nya, iya besemaya ngagai rayat ke alai iya deka terus gawa negi sereta beratika peminta pengelantang rayat di nengeri tu.

Iya ngaku bemacham ubah udah dipeda berindik ari ubah tusun kabinet nengeri pengudah Pakatan Harapan (PH) menang ba Pengawa Bepilih Besai Ke-14 (GE14) lalu megai atur pengawa perintah besai.

“GE14 udah tembu, diatu awak ngagai kitai terus fokus lalu baka ni nempa menua Sarawak nyulut ba sukut pemansang.”

Udah nya ba program ke sama, iya bisi ngemendarka geran perintah di baruh belanja Projek Mit Pemansang Menua Pesisir (MRP) penyampau RM10,000 ngagai gempung nya.

Ku iya, geran perintah ti diberi iya nya datai ari geran perintah nengeri.

“Geran tu diberi perintah nengeri ngagai bala MP Barisan Nasional (BN). Aku ngarapka geran tu ulih nyaup kita ( Miri Che Lee Khor Moral Uplifting Society) ba pengawa pengasih kita.”

Sepenyampau 100 penerima udah nerima pemeri Raya iya nya bantu barang pemakai enggau mata duit ari gempung nya. Sama bisi datai presiden gempung, Tony Pui.