Pengeransing KM negika hak Sarawak semampai disukung

MIRI: Komuniti pedagang Bumiputera di Sarawak nyukung penetap penemu Kepala Menteri (KM) Datuk Patinggi Abang Johari Tun Openg ngambika terus gawa negika hak nengeri tu ba Sempekat Malaysia 1963 (MA63) enggau Ordinan Perlombongan Minyak.

Sekretari Serakup Pedagang Bumiputera Sarawak ( PBMS) pampang Miri, Sarkawi Suhaili madahka sebarang pengawa enggau penetap penemu Abang Johari bekaul enggau pekara nya deka disukung dikena nyaga pemansut nengeri tu.

“Kami deka seruran nyukung pengawa Abang Johari ba pengawa negi enggau nyaga pemansut nengeri kitai,” ku iya lebuhka dirandau pengudah nyuaka pemeri ngagai bala anak patu balu ‘Anak Anak Kesayangan Kami’ di premis iya di Pujut 8, ditu, kemari.

Sama bisi datai Tukang Wang PBMS Razali Sunji enggau penyelia Anak-anak Kesayangan Kami Ustaz Zulkipli Mazlan.

Iya ngelansa pasal pengawa Petroliam Nasional Bhd (Petronas) minta ngagai Kort Besai ngenukuka sida ngempu ekslusif pemansut petroleum enggau ngatur ba proses keterubah di Malaysia, nyengkaum Sarawak.

Pemansut petroleum Sarawak dijaga nengah Sempekat Malaysia 1963 eng- gau Konstitusyen Perintah Besai.

Nitih ku Sarkawi, Perintah Besai udah ngelanggar Sempekat Malaysia enggau Konstitusyen Perintah Besai lebuh ngerampas pengawa ngemata minyak enggau gis Sarawak nengah Akta Pembangunan Petroleum enggau Akta Wilayah Laut, ti enda dikemendar nitihka konstitusyen nengah Aum Kunsil Nengeri (DUN) Sarawak.

“Aku ngarapka semua ketuai di Sarawak nyengkaum gerempung ukai dikuasa perintah enggau politik nadai ngira penatai politik deka seruran nyukung Abang Johari nyaga pemansut kitai,” ku iya.