400 iku kaban PRS Bukit Assek ngemansutka diri ari parti nya

SIBU: Mayuh agi kaban Parti Rakyat Sarawak (PRS) ngemansutka diri ari parti pengudah nadai agi pengandal ngagai ketuai dipegai presiden parti Tan Sri Datuk Amar Dr James Jemut Masing.

Sekali tu gintir PRS Bagi Menua Bukit Assek diketuai chairman iya, Kunsilor Duli Sanggau begulai enggau lebih 400 iku kaban madahka diri pansut ari parti bebala mayuh.

Bala kaban PRS Bagi Menua Bukit Assek ti keem- pat madahka diri pansut ari parti pengudah PRS Pampang Senadin kena 20 Mei dientudi PRS Bagi Menua Kakus ( 29 Mei) enggau PRS Bagi Menua Tamin (2 Jun).

Duli madahka semua sida pansut ari PRS laban nadai agi pengandal ngagai ketuai parti kelebih agi Masing ti diperati semina ngemeratka kroni aja.

“Isu bepilih nyiri sekretari politik parti, semua udah diatur Masing nadai nitihka tusun dalam parti, tang milih kroni iya ungkup pangku pengawa nya.

“Nya kebuah kami milih meleka ari parti. Pemutus digaga pengudah randau begulai,” ku iya nerang lebuh dirandau pengarang berita di rumah iya di Sibu, kemari.

Ku Duli, PRS Bagi Menua Bukit Assek mega ngansak Masing ngemaduka diri ari pangku pengawa nyadi presiden parti lalu megai tanggungpengawa parti alah rambau Pengawa Bepilih Besai (PRU) ke-14 tu tadi.

“Pengawa kami meleka ari parti endang volunteer, nadai pejal ari sebarang raban. Sekali agi aku madahka kami pansut ari parti laban enda setujuka ketuai dipegai Masing enggau kroni iya,” ku iya.

Sama bisi datai Sekretari PRS Bukit Assek Casper Kayong Umping, Ketuai Indu PRS Bukit Assek Edan Manan, ketuai Nembiak PRS Bukit Assek Winston Casper Kayong enggau bala kaban komiti.