Komuniti Bidayuh dilalau anang enda ingatka penatai sida iya empu

SERIAN: Komuniti Bidayuh dilalau anang enda ingatka penatai sida iya empu taja pan dalam timpuh ke sebaka nya mega, rayat menua tu belumba ngulihka pemansang.

Menteri Pelajar, Sains enggau Pansik Teknologi, Dato Sri Michael Manyin Jawong madahka, penatai sereta kelala pupu bansa Bidayuh nyengkaum adat enggau pesaka, ngingatka kitai anang sesekali enda ingatka penatai diri, ku iya.

Ketegal nya ku iya, iya nyukung pengawa mandang sereta ngangkatka ajat, sereta adat pesaka ke bisi bekait enggau Gawai baka Gawai Mpring Sawa 2018 ti digaga di Awah Gawai Kampung Pichin, ke dipunka Manyin di Kampung Pichin hari Lima minggu nyin tadi.

“Tu ke ngelai kitai sereta mida kitai ari pupu bansa bukai. Nya kebuah kitai patut mandangka adat pesaka ba pengawa bansa tu, ngambika ulih dipeda rebak baru, laban enti enda bansa nya, adat pesaka bansa tu deka punas,” ku iya.

Ba atur pengawa nya ujung minggu nyin tadi, urung 2,000 iku mensia mayuh bisi ngelawa Awah Gawai, alai atur pengawa ke mandangka mayuh macham ajat ari sekeda genturung pendiau bisi dipandangka.

Atur pengawa nya diatur ulih Gerempung ketuai Komuniti Serian enggau Gerempung Dayak Bidayuh (DBNA) pampang Serian.

Manyin, ti mega nyadi Kaban Kunsil Nengeri (ADUN) Tebedu meri puji ngagai pengatur program tu ke udah ngatur pengawa nya, lalu dikarapka pengawa bansa tu ulih digaga baru taun baru tu ila.

Ba jaku iya malam nya, iya madahka pemerat pelajar sereta pemansang komuniti.

Ku iya, apai indai nyadi orang ke berat betatika pelajar anak sida iya.

“Apai indai patut ngemata sereta ngiring ngembing bala anak kitai, nyukung sereta meransang sida iya,” ku iya. Sama bisi enggau ngulu atur pengawa nya, ADUN Bukit Semuja, John Ilus, sekretari politik ba Opis Kepala Menteri, John David Nyauh, Residen Serian, Johnathan Lugoh, Pegawai Pelilih Menua Serian, Lim Hock Meng, Pegawai Pelilih Menua Tebedu, Raymond Achen, Sekretari Opis Kunsil Serian, Constantine Noeb, enggau ketuai komuniti betuaika Temenggong Henry Bujang Sadok enggau Temenggong Gee Ah Chok.