Peranak Long Panai merambu mindah ngagai pengentap baru

MIRI: Peranak genturung pendiau Long Panai, Tutoh di Baram ngandalka diri ulih mindah ngagai menua tinggi agi dikena nyeliahka penusah bah ti mai penusah besai ba pengidup bala komuniti di menua nya.

Ketuai komuniti, Emang Anyi madahka penusah bah suah mangka, di pengentap pendiau bansa Penan ti udah bisi dientak urung 40 taun ke udah, enda kurang ari tiga kali setaun. Taja pia, nyau majak suah nyadi beberapa taun ke udah.

“Kami diatu ngansak ngambika rumah panjai kami mindah ngagai tanah tinggi agi laban genturung pendiau kami seruran dituntung penusah bah, ninting taun. Enti kita meda ba surat berita, Long Pinai, iya nya sebuah genturung pendiau ti tampak rita enggau penusah bah iya.

“Diatu kami nguji ngentak genturung pendiau baru lalu begunaka sukung ukai semina ari renggat nengeri aja tang mega ba renggat perintah besai nentuka pemujur ngagai genturung pendiau baru ti deka sedia diperambu enda lama agi dikena nyeliah penusah bah ari mangka genturung pendiau taja maya musim pasang surut,” ku Emang madah ngagai The Borneo Post lebuhka dirandau rambau Hari Ruang Bilik diatur Kampung Long Panai di Tutoh Society di Luak Esplanade kemari.

Ngelansa pasal program ninting taun nya, ku Emang, hari ruang bilik nyediaka pelasar ungkup lebih 100 iku kaban ti diau enggau gawa di mengeri tebal agi ari Miri enggau Bintulu, sereta sida sebilik ari semua serak idup, begempuru enggau pangan diri.

“Tuju iya dikena ngerapitka kaul antara bala kaban sereta peranak bansa Kayan ari Long Panai,” ku iya.

Emang nyemetak madah kelimpah ari hari ruang bilik, serakup nya mega bisi ngatur aktiviti belalauka komuniti bukai baka ngagauka bala pakar enggau speaker ngagai genturung pendiau sida meri penerang ngagai peranak dia pasal sebarang penerang pasal pemansang enggau pengulih ekonomi pemadu baru ngambika ulih ngangkatka peranak di rumah panjai.

“Kitai mega ngemai raban personel ari Opis Pengerara Api enggau Penyah Penusah (Bomba), polis, opis pengerai, Nagang Pengawa Gian Dadah Bansa ( AADK) ngambika nerang ngagai peranak pasal pangku pengawa enggau tanggungpengawa sida,” ku iya nambah.

Pia mega ku Emang, bala sida deka ngatur pengerami makai lemai mantar Krismas ungkup peranak Long Pinai di Eastwood Golf and Country Club kena 2 Disember tu.