PRS ngenataika perambu deka numbuhka sebuah parti ti ngarika genap pupu bansa ke bisi di Nengeri Sarawak
KUCHING: Kepala Menteri Datuk Patinggi Abang Johari Tun Openg deka berundingka perambu ari Parti Rakyat Sarawak (PRS) sentang atur numbuhka sebuah parti ti ngarika genap pupu bansa di nengeri tu.
Iya ke mega Presiden Parti Pesaka Bumiputera Bersatu (PBB) madah, bisi nerima perambu nya ari presiden PRS Tan Sri James Masing.
“Sigi amat iya (Masing) bisi mai perambu nya.Kitai deka berundingka perambu nya.
“Tang pekara tu sebengkah evolusyen lalu kitai anang begaut,” ku Abang Johari.
Iya mansutka jaku nya lebuh dikerandau pengudah meri basa ke penudi ngagai niang Datuk Sim Swee Yong di lurung 2A, Everbright Estate Batu Kawa kemari.
Sim ,85, mutuska seput di Palan Berubat Timberland ditu urung jam 8.30 malam Hari Minggu ketegal sakit tungkul ati.
Ngenang kaul ke sama,
Sigi amat iya (Masing) bisi mai perambu nya. Kitai deka berundingka perambu nya. Datuk Patinggi Abang Johari Tun Openg Kepala Menteri Sarawak
Abang Johari madah ba maya rayat nengeri tu udah bisi runding nuju pekara nya tauka ba maya sida udah meretika pemerat begempung, nya mih maya ke ngena endur ngemujur perambu ari PRS nya.
“Kitai deka berundingka pekara tu, tang begunaka timpuh,” ku Abang Johari.
Masing kena 12 Jun tu tadi ngenataika perambu nya ngagai Abang Johari.
Perambu dikenatai ba maya empat parti dalam gempung Barisan Nasional (BN) Sarawak nyerara diri ari BN lalu numbuhka Gabungan Parti Sarawak (GPS).
Parti ti ngarika genap pupu bansa nya ku Masing deka ngintu kelimpah ngenah tetiap bansa di nengeri tu enggau lurus.
Ensanus, iya ngenuku empat penetap ke tau ngasuh parti nya mujur ditumbuh.
Entara sekeda penetap iya nya nadai sebuah parti ke bengat megai kuasa ba dalam gempung parti baru nya ke alai penemu enggau runding ari semua parti deka diambi kira.