Dr Jeniri: Pinta PRS enda engkeman ba maya ke diatu
KUCHING: Pinta ti ditetapka Parti Rakyat Sarawak ( PRS) ngambika Gabungan Parti Sarawak ( GPS) nyadi siti parti politik pupu bansa dipeda enda engkeman diatu.
Penganalisis Politik ari Universiti Malaysia Sarawak (UNIMAS), Prof. Madya Dr Jeniri Amir madahka pekara ti nyangka patut digaga iya nya nusun baru GPS laban nya endang siti pelasar ungkup pupu bansa.
“Aku enda berundingka Parti Pesaka Bumiputera Bersatu (PBB) deka setuju enggau leman pekara dipinta nya kelebih agi pekara ti dipinta Tan Sri James Jemut Masing ngambika PBB tauka sebarang parti enda nguasa parti bukai.
“Nya alai (aku) enda nemu nama tuju tauka agenda iya (Masing) laban PRS tu nyauka baka udah nyata ditulak rayat rambau Pengawa Bepilih Besai (PRU) tu tadi, parti nya lenyau tiga ari enam penuduk ti diperebut,” ku iya madah ngagai Utusan Borneo kemari.
Ku Jeniri, jalai dikena ngamatka penemu nya endang ulih dikereja tauka enda, PRS patut mantaika empu enggau parti nya nyadi gempung besai lalu nguji ngereja nya di luar GPS.
Iya mega nanya sekalika tuju ulah Masing nya dikena nyelamatka diri empu sereta parti enggau ngiga dalih bukai ari pengelemi ti udah nyadi.
“Masing madahka iya enda ‘besebana’ ngagai PBB tang lebuh madahka amat UMNO nguasa, tu nyau nyengala ngayanka PBB mega.
“Ba aku, Masing tu mejah pekara ti nyadi dalam GPS ke alai PBB ngelama tu nyadi parti dominan, tentu PBB enda setuju, enti ngengkahka Masing ba penuduk nya, bedau tentu iya deka,” ku iya.
Nitih ku Jeniri, pekara ti beguna amat diatu iya nya nentuka survival parti enggau GPS laban ba penuduk ke diatu, PBB diperati enda betapi enggau penanggul.
“Ti bepenanggul diatu iya nya PRS, nyangka ketegal nya Masing mantaika penemu tu dikena nyelamatka diri enggau parti.
“Tu iya nya tradisyen sida, ngelama tu lalu iya (Masing) patut nerima enti agi deka meruan dalam GPS. Patut dikeingat, PBB iya nya parti pupu bansa, semua peranak asal bisi di dalam nya, bebida mimit enggau PRS,” ku iya nambah.
Jeniri mansutka jaku nya lebuh dipinta nyebut pasal empat pinta ti ditetapka PRS ngambika nempa GPS siti parti pupu bansa dikena nentuka iya diterima rayat.
Kelimpah ari netapka nadai nguasa parti besai agi ngagai parti bukai ti mit agi, PRS dekaka servis gawa perintah nengeri ditusun baru kelebih agi ari sukut ngambi pekereja ti ngayanka penyebela penuduk bansa.
Dua agi pinta ditetapka PRS iya nya mutarka isu tanah hak Adat Bansa Asal (NCR) enggau manah agi sereta agih belanja ninting taun ungkup gerempung ngarika pengarap ukai Islam di Sarawak.
Ku Masing, pinta ba pekara nya deka nentuka GPS enda nunda struktur Barisan Nasional (BN) sebedau tu iya nya UMNO nguasa parti komponen ti mit agi dataika pinta enggau penanggul parti bukai di dalam gempung nya enda diperati.
Iya madahka BN alah ba PRU14 tu tadi ukai ketegal iya enda manah tang bisi parti iya nya UMNO nguasa parti bukai.
“Ari nya, GPS enda ulih nejuka parti ti besai agi nguasa lalu PRS enggaika siti parti aja bisi lebih ari setengah Kaban Kunsil Nengeri ( ADUN). Diatu kitai (Sarawak) bisi 82 penuduk,” ku iya.