Zuraida deka nemuai seraya gawa ke Sarawak kena 20 Jun
KUCHING: Kaban Parlimen (MP) Ampang, Zuraida Kamaruddin, ti sebedau tu ditagang tama ngagai Sarawak, deka nemuai seraya gawa keterubah endar iya nyadi Menteri Pengawa Berumah enggau Kaunsil Kandang Menua ditu.
Nitih ku atur pejalai penerebai, ketuai indu Parti Keadilan Rakyat ( PKR) nya dipelaba bekejang ari Padang Bilun Antarabansa Kuala Lumpur urung pukul 11 pagi, 20 Jun tu.
Ba hari ke nangkanka nya, iya diperambu nemuai meri basa ngagai Menteri Kaunsil Kandang Menua enggau Pengawa Berumah Datuk Dr Sim Kui Hian sebedau nampung pejalai nemuai meri basa ngagai Kepala Menteri Datuk Patinggi Abang Johari Tun Openg ba opis iya.
Iya mega diperambu nemuai seraya gawa ngagai Opis Kaunsil Padawan (PMC) di Batu 10, ngabas PPR Sungai Tengah sereta nemuai seraya gawa ngagai indu opis Opis Pengerara Api enggau Penyah Penusah ( Bomba) Sarawak ditu ,sebedau mulaika diri ngagai Kuala Lumpur muak ke lemai.
Zuraida deka nyadi menteri keterubah ari perintah besai baru nemuai ke Sarawak pengudah Pakatan Harapan (PH) megai Putrajaya ari Barisan Nasional (BN) ba Pengawa Bepilih Besai Ke-14 (PRU14) kena 9 Mei tu tadi.
Sebedau PH megai kuasa, iya antara beberapa iku ketuai PH ti udah ditagang tama ke Sarawak.
Ke penudi endar Zuraida enda disagi tama ngagai Sarawak lebuh iya sangkai di Miri kena 23 September taun nyin tadi sebedau pengaga undang-undang PKR begempuru ba pengerami makai lemai ngiga ‘Diamond Fund’ ba hari ke sama enggau ‘Purple Women’s Walk’, pengawa mantah politik kamah ba hari ti nangkanka nya.
Nitih ku surat rasmi ti dianjung iya, Zuraida ditagang tama laban nengeri enggai meri pemendar ngagai iya.
Notis Imigresyen dibacha. “Tuju tu madah ngagai nuan ke alai atur seksyen 65 (1) (a) Akta Imigrasyen 1959/6, Raban Bekuasa Nengeri udah ngerah ngambika nadai pemendar dikeluar ngagai nuan ngambika tama ngagai Nengeri Sarawak, lalu pemendar nya dipinta di baruh seksyen 66 (Akta ke sama) ngambika tama ngagai nengeri tu.”
Zuraida keterubah ditagang tama ngagai Sarawak dalam taun 2013. Iya sekali agi ditagang tama dalam taun 2014 enggau 2016 lebuh iya deka nyaup chalun PKR ba pengawa bepilih Nengeri Sarawak.
Taja pia, berindik ari pemujur PH menang rambau PRU14 tu tadi, Perintah Sarawak udah ngalihka tagang tama ngagai bala ketuai PH ti udah dipadu nyadi menteri kabinet apin lama ke udah.
Pekara tu udah ditukuka Direktor Opis Imigresyen Nengeri, Ken Leben kena 23 Mei tu tadi.
“Endang amat ke alai perintah nengeri nengah Opis Kepala Menteri udah ngemendarka semua menteri perintah besai tama ngagai Sarawak.
“Aku nerima gerah kemari ( Hari Dua) lalu ngalihka tagang tama deka dipejalai enggau naka penyampat,” pia ku jaku dipenerang iya.
Berebak enggau nya, sida ti enda ditagang agi nyengkaum Presiden Parti Amanah Negara (Amanah) Mohamad Sabu, ti udah dipadu nyadi Menteri Ngetanka Menua enggau Menteri Perengka Pengangkut, Anthony Loke.
Penemuai Zuraida ngagai Sarawak dipelaba deka mai berita manah pasal rumah ulih dibeli, laban PH endang bebendar deka ngamatka semaya digaga ba manifesto sida ti deka nangkup peminta satu juta rumah ulih diberi di Malaysia dikena nyaup rayat, kelebih agi raban nembiak ngambika ngembuan rumah keterubah sida.
PH mega udah besemaya dalam manifesto sida deka ngemanahka polisi pengawa berumah menua tu nyengkaum ngembuan skim jali berumah khas.