Gelar Dayung Gawea Tematu 2018 deka direbut 15 pesereta
KUCHING: Sepenyampau 15 pesereta deka bepekit ngerebut gelar Dayung Gawea Tetamu 2018 ba pekit kepenudi kena 30 Jun tu di Balai Mayuh Kampung Tematu semak ditu.
Pesereta kepenudi datai ari Jaequeencya Delyva Douglas (Kampung Garung, Padawan), Wilsey Barnabas (Kampung Sigubang, Bau), Felisia Frances Jimmy (Kampung Tanjung Poting, Singai, Bau), Mitchelle Shellin Promix (Kampung Tematu, Kuching), Priscillya Stevenson Satu (Kampung Stenggang, Bau), Jemima Fae James (Kampung Stass, Bau), Alaing Max Zelyn Sulaiman (Kampung Sungai Duuh, Siburan) enggau Jelianicca Lorettanisha Rumih (Kampung Plaman Payang, Padawan).
Bela mujur bepekit renggat kepenudi iya nya Rorlles Sollow (Kampung Bangau, Penrissen), Gloria Willi (Kampung Abad, Siburan), Shezlin Annzi Tan (Kampung Giam, Padawan), Wilna Willy (Kampung Tematu, Kuching), Ervina Fiffy Ted (Kampung Karu, Padawan), Ernesta Michael Lopest (Kampung Seratau, Siburan) sereta Audrey James ( Kampung Mayang Kawan, Serian).
Chairman Pengatur John Pata madah pengawa milih 15 pesereta kepenudi udah diatur kena 16 tu tadi di genturung pendiau nya.
Kelimpah ari pengawa milih 15 pesereta kepenudi, pesereta mega nitihka aktiviti manduk lemang enggau bengkel pemajik gamal ari Mary Kay.
Champion deka nerima perais mata duit RM1,700 disempulang jumpang, segempung bungai, selampai, trofi, hamper enggau setipikit penyereta.
Seraya pemenang lumur dua enggau tiga bela deka nerima perais mata duit RM1,400 enggau RM1,100 disempulang jumpang, segempung bungai, selampai, trofi, hamper enggau setipikit penyereta.
Pesereta ti enda mujur deka nerima perais sagu ati mata duit RM100, hamper enggau setipikit penyereta.
Kelimpah ari gelar Dayung Gawea Tematu, pekit tu mega nyediaka empat gelar bukai iya nya Ratu Bakat, Ratu Populariti, Ratu Personaliti enggau Ratu Fotogenik sereta Pekayan Pemadu Manah.
Pemenang ba kategori tu deka nerima perais mata duit RM200 sereta trofi enggau selampai.
Pekit ti datai ba taun kelima diatur tu nyerumba Karnival Gawai Tematu 2018 kena 29 enggau 30 Jun tu.