Pemidang niang Bill meruan dikeingatka raban PEDAS
KUCHING: Serakup Dayak Sarawak (PEDAS) Pampang Kuching nandu pengawa nungkun dian dikena ngingatka pemati bujang berani niang Bill Kayong genap dua taun kena 21 Jun tu.
Pengawa deka berengkah diatur urung pukul 7 lemai di Dataran Pahlawan, Laman Budaya di Kuching ditu, besepiak enggau Muzium Sarawak, lalu pengawa tu udah minta pemendar ari raban bekuasa bekaul.
Nitih ku Mandal Presiden II PEDAS, Victor Ason, pengawa nungkun dian tu kelimpah ari ngingatka pemati niang Bill, pengawa tu dikena meri basa enggau ngenang jasa niang ti keran sereta angkun gawa negika hak raban bansa Dayak di nengeri tu.
“Kami Pedas selampur nengeri meruan ingat sereta bekenangka pemanah pengawa, penyiru sereta basa niang lebuh bejalai gawaka bansa suba, kelebih agi ngetanka hak tanah Adat Bansa Asal (NCR).
“Kitai mega bela nemu pemati niang ketegal penger- an ti ngelui ari pengulih diri empu,” ku Victor ke lalu nyadi Ketuai Pampang Pedas Kuching.
Ku Victor, niang siku orang ti nelap sereta imun gaya tang chukup kering ba penemu, pintar runding ba pengawa dikereja iya. Penemu ensuruk sereta jaku pesan niang seruran digenggam rat nyadika lalau raban Pedas ngatur pen- gawa dataika sehari tu.
Nya kebuah raban Pedas nesau mensia mayuh sekalika ari raban gempung ukai dikuasa perintah (NGO) ke bukai, raban ari ejensi enggau sektor korporat tauka raban ngatika diri ari serap menua bela sampal datai ngulu seraya meri sukung ngagai atur pengawa tu.
“Penatai bala kita ila meri reti chukup besai ngagai kami kelebih agi sida niang sebilik, sukung ari bala kita meri pengering ati ngagai kitai semua ti puang ditinggalka niang,” ku Victor madah nyemetak.