JC Fong: Penyarut nyadi ketegal Petronas enggai nitihka undang-undang Sarawak
PUTRAJAYA: Sarawak ukai deka neritka undangundang nengeri enggau chara ti deka ngenusahka sesapa tauka industri minyak enggau gis.
“Kepala Menteri (Sarawak Datuk Patinggi Abang Johari Tun Openg)udah suah madahka pekara nya, ke alai Petronas patut pechayaka kami,” ku Penyanding Penemu Undang-undang Sarawak Dato Sri J.C. Fong ngagai pengarang berita pengudah Kort Federal nulak peminta Petronas deka neruska prosiding ngagai Perintah Sarawak.
Fong bebendar madahka penyarut nyadi ketegal Petronas enggai nitihka undang- undang Sarawak.
“Petronas madahka sida enggai nitihka undang-undang Sarawak, tu enda ulih diterima. Ari nya mih penyarut nya berengkah,” ku iya.
Bulan Apil apin lama, Abang Johari madahka kompeni ti beoperasyen dalam sektor minyak enggau gis pengepun ba Sarawak enda tau enda ngambi suwa enggau lisin ti patut ari perintah nengeri berengkah 1 Julai.
Abang Johari madahka pekara nya enda tau enda dipinta ngagai kunteriktor,kunteriktor enggau vendor.
Ba sebengkah interbiu sebedau tu enggau The Edge Malaysia, iya madahka tikas penuduk nengeri pun iya bepelasarka Ordinan Ngelumbung Minyak 1958.
Akim Besai Nengeri Sarawak nulis surat ngagai Petronas kena 13 April apin lama dikena madahka pasal juluk perintah nengeri awakka bejalaika penetap pinta nya.
Datuk Talat Mahmood Abdul Rashid mega nyebut nengah operasyen nya ba nengeri tu enti nadai pemendar enggau lisin diguna deka ngelaban undang- undang pengudah 1 Julai.
J.C Fong mega bebendar madahka Sarawak deka terus bekerejasama enggau Petro- nas sereta ngarapka Petronas deka begulai enggau sida ngambika ke pemaik industri minyak enggau gis.
“Kami semina deka Petronas di Sarawak ke bulih penguntung ari pengeraja asal ba nengeri tu iya nya petroleum nitihka undang-undang nengeri.
“Kami deka nitihka undang-undang perintah besai ti patut betul nitihka konstitusyen lalu kami dekaka Petronas nitihka undang-undang nengeri,” ku iya.
Dalam kes ti miak ngagai Perintah Sarawak nya, Petronas diarika raban luyar ti betuaika Datuk Malik Imtiaz Sarwar.
Menteri Muda Undangundang, Kaul Nengeri-Perintah Besai enggau Pematau Projek Sharifah Hasidah Sayeed Aman Ghazali lebuh dikerandau pengudah kes ke besejarah nya bebendar madahka Penegap undangundang udah mujur enggau pemutus Kort Federal ke alai pemujur ba pemendar negika hak rayat Sarawak.
“Kami deka nempa kerejasama enggau Petronas sereta deka meda sida mujur nengah chara bekaul rat enggau kami,” ku iya.
Lebuh ditanya sekalika Sarawak deka terus minta royalti sepenyampau 20 peratus ari Petronas, Hasidah madahka pengeran tauka pemendar deka negika hak Sarawak ke deka diteruska.
“Aku enda ulih ngenang pasal pekara tu diatu tang kami deka majak negika hak Sarawak,” ku iya.
Sekretari Besai Parti Rakyat Bersatu Sarawak (SUPP) Datuk Sebastian Ting ti sama ngulu prosiding enggau nitihka prosiding chara terus ngena telefon pintar iya ari galeri, madahka telefon binching iya penuh enggau pesan.
Sebastian meri pengaga ati ngagai raban undang - undang Sarawak nyengkaum Talat, J.C Fong, Sapit Akim Besai Sarawak Saferi Ali, enggau pemesai undang- undang Mohd Adzrul Azlan, laban ti bebendar lalu teulihka pemujur.
Pemujur menang nya ku iya, diulih asil ari penyulut pejurai ti dikenataika raban undang - undang Sarawak dikena ngamatka kes sida.
Sebastian madahka pemutus nya ngamatka hak Sarawak neritka undang-undang ba nengeri tu bekaul enggau isu ti dibantaika Petronas.
“Sehari tu iya nya hari ke penuh pengaga ngagai Sarawak sereta meri pengaga ati ngagai Kepala Menteri Sarawak enggau raban undang - undang ti udah mujur ngamatka kes kitai,” ku iya.