GPS disadang dilanchar 22 Julai 2018 Protem komiti udah ditumbuh lalu diarika presiden enggau sekretari besai ari 4 parti
KUCHING: Gabungan Parti Sarawak (GPS) ti diarika empat parti disadang deka dilanchar kena 22 Julai 2018.
Lambang GPS mega deka dirijister ke alai kitai deka ngatur pekit ngaga lambang tu ungkup semua peranak Sarawak. Datuk Alexander Nanta Linggi Sekretari Besai PBB
Nitihka penerang Sekretari Besai Parti Pesaka Bumiputera Bersatu(PBB) Datuk Alexander Nanta Linggi, protem komiti udah ditumbuh lalu diarika presiden enggau sekretari besai ari semua empat parti.
“Protem komiti tu deka nyaup ngemujur atur ngerijista GPS ba Opis Pengerijister Gerempung (ROS).
“Lambang GPS mega deka dirijister ke alai kitai deka ngatur pekit ngaga lambang tu ungkup semua peranak Sarawak,” ku iya.
Alexander mansutka jaku nya ba aum pengarang berita pengudah ngulu aum komiti khas GPS ke diatur di Indu Opis PBB ditu, kemari.
Empat parti dalam GPS iya nya PBB, Parti Rakyat Sarawak (PRS) Parti Bersatu Rakyat Sarawak (SUPP) enggau Parti Progresif Demokratik (PDP).
Alexander nambah, semua pekara ke bekaul enggau atur numbuhka GPS baka ke ba sentang konstitusyen meseti diadu dalam timpuh sebedau 22 Julai.
“Surat mega deka ditulis ngagai Dewan Rakyat enggau pemangku Chairman Barisan Nasional (BN) madah diak kitai udah nyerara diri ari BN,” ku iya.
Ngenang sentang pekit ngaga lambang GPS, Alexander madah pekit nya nyendia perais mata duit lalu semua penerang deka diayan ba media enggau Facebook berengkah ila.
“Kitai dekaka lambang tu ngundan chura menira Sarawak sereta mandangka budaya Sarawak,” ku iya.
Hari penudi nganjung lambang ditetap 10 Julai 2018, tandu Alexander.
Aum kemari digulu Sekretari Besai ari SUPP Datuk Se- bastian Ting, Datuk Anthony Nogeh (PDP) ke alai PRS diarika Sapit Ketuai Pemadah Chritopher Gira.
Bela datai Ketuai Nembiak PRS Datuk Snowdan Lawan, Robert Ayu (PDP), Micheal Tiang (SUPP), Sapit Ketuai Nembiak PBB Fazruddin Abdul Rahman, Ketuai bagi Orang Indu PRS Dato Sri Dorris Brodie enggau Dato Sri Fatimah Abdullah (PBB).