PKR udah ngaga ripot SPRM bekaul projek jalai di Kanowit

SIBU: PKR Bagi Menua Kanowit, Lanang enggau Sibu kemari ngaga ripot ngagai Komiti Nagang Penyalah Makai Suap Malaysia (SPRM) belaul belanja RM50 juta ari perintah besai sebedau tu ti dikemendar dikea ngaga Jalai Nanga NgungunNanga Jagau di Kanowit sepanjai 22km.

Agih belanja nya dipadahka ex-menteri besai Datuk Seri Najib Tun Razak maya kimpin pengawa bepilih kunsil nengeri di Rumah Taboh, Skim Pengentap Rascom di Nanga Ngungun kena 27 March 2016.

Sekretari Bagi Menua PKR Kanowit George Chen madah taja agih belanja nya udah dikemendar, tang pengawa ngaga jalai nya lalu bedau berengkah.

“Kami ke nyadi rayat Sarawak, deka nemu endur duit nya diatu? Kati duit nya udah diberi tauka dirampas kaban politik ungkup pemansang ba sitak bukai? Nyadi kami deka nemu,” ku iya madah ngagai pemberita pengudah ngaga ripot ba opis SPRM di Wisma Persekutuan ditu, ensana.

Iya madah munyi nya rambau pengerami nasih tanah ungkup projek jalai nya ke digaga tiga kali iya nya 2012, 2014 enggau 2016.

Kelimpah Najib, ripot nya mega digaga ungkup Sapit Kepala Menteri Tan Sri Datuk Amar Dr James Masing enggau Kaban Parlimen Kanowit Datuk Aaron Ago Dagang, ke didawa Chen udah ngaga semaya bula ba pengawa ngulihka sukung pengundi maya pengawa bepilih besai.

Rayat ari 40 buah rumah panjai ba sitak nya nyau ngena jalai batang pulai mansang ke pasar kanowit laban semaya nya enda dikeamat.

Iya madah maya musim landas, jalai batang nya enda ulih tengah semua entukar, ngujungka pengidup rayat ba sitak nya majak tusah.

Ketetiga Bagi Menua PKR nya ngaga ripot polis bekaul pekara nya ba Balai Polis Kanowit kena 6 Jun enggau ba Unit Penyalah Komersil Indu Opis Polis Pelilih Sibu kena 11 Jun.

Sama bisi datai Chairman PKR Kanowit Thomas Laja Besi enggau Chairman PKR Lanang Law Hin Ching. — Bernama