Raban soldadu udah pinchin diperansang nyereta PVTM
KUCHING: Raban pinchin Soldadu Malaysia di nengeri tu ke bedau masuk nyadi kaban gerempung enda ngira bagi gerempung raban soldadu baka Persatuan Veteran Tentera Malaysia (PVTM) Negeri Sarawak, diperansang ngerejista diri.
Panglima Briged Ketiga Infantri Malaysia, Brigedier Jeneral Bustaman Mat Zin madahka nya ngambika sama ngasaika bantu pengintu pengelantang pendiau sereta bulih penerang ke pemadu baru ari perintah nengah gerempung.
“Gerempung tu (PVTM) tu mega siti gempung ti ngarika tiap iku kaban ngenataika penemu enggau penanggul, ngambika ulih dipadahka ngagai piak ke patut.
“Nya alai nyema agi bisi ba luar din bala pinchin soldadu ke bedau ngerejista diri nyadi kaban enda ngira ba bagi gerempung, aram meh ngerejista diri.
“Laban tanggungpengawa gerempung tu amat beguna iya nya nyadi sebuah gerempung tauka endur perintah ngenataika sebarang penerang, lebih agi bekaul enggau mayuh macham bantu pengintu pengelantang ke bisi disediaka,” ku iya.
Bustaman mansutka pekara nya lebuh bejaku seraya bejadika Mesyuarat Agung Tahunan Kali ketujuh PVTM Negeri Sarawak ke diatur ba Dewan Bukavu, Kem Penrissen ditu, kemari.
Berebak enggau tu iya mega meransang bala kaban gerempung bejalaika tanggungpengawa diri sereta nyukung pekara nyengkaum aktiviti ti diatur gerempung.
“Sepemanjai ke ditemu aku, gerempung tu (PVTM) endang chukup dikelala ukai semina ba Sarawak aja tang mega dikelala di Semenanjung Malaysia.
“Nya alai aku ngelalau semua kaban patut bebendar nyaga nama manah gerempung tu,” ku iya.
Kelimpah ari ba pengerami nya Thomas Ling Kui Eng dalam jaku pengelalu ti kepenudi iya nyadi presiden PVTM kemari, iya mega madahka nyadi tanggungpoengawa kaban nyaga nama manah enggau imej gerempung ngambika ulih terus dikemegah raban bansa nengeri sereta menua tu.
Thomas madahka gerempung nya bulih pechara sereta sukung ari genap serak raban bansa nyangkaum pemesai nengeri enggau menua ti seruran meri bantu belanja dikena nguruska pentadbiran gerempung enggau bantu pengelantang pendiau kaban gerempung.
“Gerempung kitai dikelala nyadi sebuah gerempung ke pemadu regas tauka aktif sereta komited ulih semua gerempung enggau kelab veteran ti ukai semina ba Nengeri tu tang di Sabah enggau Semenanjung.
“Sepemanjai taun 2017 kitai bisi ngatur 74 aktiviti sereta kitai bisi nganjung 11 usul ngagai Menteri Pertahanan ke baru, ke bekaul enggau pemaik veteran,” ku iya.
Maya ke bejaku nya Thomas meri terima kasih ngagai semua kaban PVTM Nengeri Sarawak ke udah meri sukung enggau kerjasama sepemajai timpuh enam taun tauka dua penggal nyadi presiden.
“Ngarapka bala kaban gerempung terus meri sukung penuh ngagai Kaban Komiti (AJK) baru (20182021) ke dichirika. Besaup meh neruska perjuangan gerempung dikena nyaga pengelantang pendiau bala kaban gerempung jemah ila,” ku iya.
Nyerumba aum, pengawa milih AJK sesi 2018-2021 bisi diatur ke alai Presiden baru iya nya Francis yeo Wang Hui enggau Sapit Presiden Idris Adam.
Sama bisi datai ngagai pengerami bejadika aum nya kemari, Direktor Opis Pekara Veteran (JHEV) Pampang Negeri Sarawak, Lt Kol Dunging Serit. KUCHING: Pemutus Kort Federal nulak pinta Petroliam Nasional Berhad ( Petronas) enda ngeruga pengeran kompeni minyak menua nya minta undangundang meri penerang ba sentang hak enggau status Petronas nengah Akta Pembangunan Petroleum (PDA) 1974.
Petronas nengah surat penerang berita kemari madah pemutus nya digaga bepelasarka kebuah teknikel ketegal diluar kuasa Kort Federal.
Tajapia, Kort Federal enda nentu tauka meri endos merit undang- undang ke diambi Perintah Sarawak dikena nyaga sereta ngatur aktiviti ngelumbung minyak nengah Ordinan Perlombongan Minyak 1958.
Kort Federal bela ngerunding konsesyen Perintah Sarawak diak Akta Pembangunan Petroleum 1974 ( PDA 1974) udah diubah enggau sah.
Nya negapka agi runding Petronas diak semina Parlimen aja ulih ngubah undang- undang ke bekait enggau industri minyak nyengkaum kuasa ngatur aktiviti di selampur Malaysia, baikka nya di darat tauka ditasik nitihka PDA 1974.
Kort Federal ensana nulak pinta Petronas ngepunka prosiding undang- undang ba Perintah Sarawak bekaul enggau hak kompeni minyak menua nya ngatur sereta nyaga aktiviti ngelumbung minyak enggau gis di nengeri tu.
Pemutus digaga Akim Besai Malaya, Tan Sri Ahmad Maarop pengudah netap Kort Federal enda ulih ngaga pechara nya ketegal relif ke dipinta kompeni minyak nya enda disengkaum dalam kuasa Kort Federal tang ba Kort Tinggi.