Perintah Sarawak deka neritka agi atur ke pemaik hak rayat
KUCHING: Pemutus Kort Besai ti nulak peminta Petronas ti deka neruska prosiding ngagai perintah Sarawak, muka jalai ngagai perintah Sarawak neritka agi undang-undang nengeri berengkah 1 Julai 2018 baka ti dipadahka Kepala Menteri pun taun tu tadi.
Bepelasarka penerang berita ari Opis Kepala Menteri kemari, Kepala Menteri Datuk Patinggi Abang Johari Tun Openg meri pengaga ati ngagai raban perundangan senggau semua rayat Sarawak ti udah nyaup dalam sampi sereta sukung ngagai Sarawak bekaul pekara tu.
“Pemutus tu muka jalai ngagai Perintah Sarawak neritka agi undang-undang nengeri berengkah 1 Julai 2018 baka ti dipadahka Kepala Menteri pun taun tu tadi.
“Kepala Menteri deka meri terima kasih ngagai raban perundangan kitai sereta semua rayat Sarawak ti besampi sereta ti meri sukung tegap ngambika Sarawak nguna hak sida dalam Perlembagaan bekaul enggau aktiviti gis enggau minyak di Sarawak.
“PETROS deka diberi kuasa sewajarnya bejalaika Ordinan Perlombongan Minyak sarawak,” ku penerang ari Opis Kepala Menteri, kemari.
Mahkamah Persekutuan kemari nulak peminta Petronas ti deka neruska prosiding ngagai Perintah Sarawak.
Ketua Hakim Mahkamah Tinggi Malaya Tan Sri Wira Ahmad Maarop, lebuh nu- lak peminta nya, madahka nya deklarasyen ti dipinta Petronas ukai dibaruh bidang kuasa Artikel 4( 4) dalam Perlembagaan Persekutuan.
Petronas udah minta deklarasyen PDA 1974 dikena nyaga aktiviti huluan ba wilayah Sarawak enggau Ordinan Perlombongan Minyak 1958 ‘dimansuhkan secara tersirat’ ulih PDA.
Kelimpah ari nya, Menteri Dagang Temuai, Seni, Main Asal, Nembiak enggau Lumba enggau Main, Datuk Abdul Karim Rahman Hamzah lebuh ditanya bekaul enggau asil pemutus mahkamah nya, iya madahka, pemutus nya nyadi empas ke besai ngagai Chairman Parti Tindakan Demokratik (DAP) Chong Chieng Jen enggau bala bakih iya ke bukai.
Ku iya, Chong sereta bala bakih iya selalu madah ngagai rayat Sarawak iya nya Akta Pembangunan Petroleum (PDA) meri hak minyak enggau gis ngagai Petronas baka dalam Perundangan Persekutuan.
“Nya satu tamparan besar ngagai DAP Chong enggau bala bakih iya ti selalu madah ngagai rayat Sarawak iya nya PDA meri semua hak minyak enggau gis ngagai Petronas nyadi Perundangan Persekutuan.
“Lalu Sarawak nadai ulih ngereja utai bukai kelimpah ari perintah nengeri milih deka ngambi tindakan undang-undang ba Mahkamah dikena ngetuka PDA,” ku iya madah ngagai Utusan Borneo.
Berebak enggau tu Abdul Karim madahka, Sarawak andal ati laban mahkamah meri pemutus ti nyukung perintah nengeri sereta nulak peminta Petronas ngepunka ‘ tindakan guaman’ ngagai perintah nengeri.
“Pemutus tu besai empas iya sereta ambis nadai mahkamah mengiktiraf perintah nengeri ngembuan kuasa pasal ‘ regulatory control’ aktiviti minyak ke bisi dalam kandang endur dalam bidangkuasa Perintah Nengeri.
“Meri pengaga ati ngagai Pasukan Guaman Perintah Nengeri Sarawak,” ku iya.