PKR deka terus negika atur undang-undang ba kes munuh niang Bill Kayong
MIRI: Parti Keadilan Rakyat ( PKR) deka terus negika atur undang- undang tauka ‘ keadilan’ ba penyalah munuh niang Bill Kayong enggau chara muka baru pechara kes di kort.
Kaban Parlimen ( MP) Miri, Dr Michael Teo madahka pansik kes bedau penuh laban agi mayuh saksi apin dikangau meri penerang.
“PKR di KL endang bebendar gawa muka baru kes tu laban kes apin nyentuk,” ku iya nerang ngagai pengarang berita malam kemari.
Teo dirandau pengudah tembu pengawa nungkun dian ngingatka pemidang niang Bill Kayong ba mua klinik iya begulai enggau sida niang sebilik, bala bakih enggau kaban parti bukai.
Niang Bill Kayong @ Mohd Hasbie Abdullah ti nyadi Sekretari PKR Miri enggau ex- chalun PKR ungkup sitak Bepilih Kunsil Nengeri (DUN) Bekenu ba Pengawa Bepilih Nengeri ( PRN) udah ditembak mati kena 21 Jun 2016.
Ku Teo, ensana genap dua taun sehari niang udah lesi bebadi nyawa lalu pengawa ditegika niang nyaga pengelantang enggau ngetanka hak raban bansa Dayak deka seruran dikeingat.
“Kitai mega bisi ngabas pendam niang lalu malam tu kitai ngingatka niang Bill lalu niang deka seruran ba ati kitai. Kitai ngarapka ‘ keadilan’ deka diberi ngagai niang,” ku iya nerang.
Ngelansa pasal PRN ti deka datai, Teo ke mega Chairman PKR madahka sukung rayat ngagai parti enggau Pakatan Harapan ( PH) majak nambah.
Ku iya, PKR deka nentuka hak tanah peranak di nengeri tu deka diintu enti sema PH mujur ngerampas pengawa nyadi ketuai nengeri tu ari Gabungan Parti Sarawak ( GPS) maya PRN ti deka datai.
“Kitai bisi tiga taun agi ungkup PRN. Diatu kitai nerima mayuh sukung kelebih agi ari peranak asal. Tetiap hari mayuh sida nyereta kitai,” ku iya.
PKR di KL endang bebendar gawa muka baru kes tu laban kes apin nyentuk. Dr Michael Teo Kaban Parlimen Miri