Pengawa badas niang Bill Kayong patut diteladan rebak baru

KUCHING: Genap dua taun pemidang bujang berani Dayak, niang Bill Kayong dikenang serap menua nengah pengawa nungkun dian bebala mayuh kena lemai 21 Jun tu tadi.

“Meruan dikingat, semampai nyadi buah randau, batang kenang bala bakih sereta bala bukai lebuhka betungga, pemanah basa niang lebuhka begulai, bebakih, nadai ganti ba semua kami,” ku Victor Ason, ti nguluka pengawa nungkun dian di Dataran Pahlawan, Laman Budaya, sepiak Muzium Sarawak ditu.

Pia mega ku Victor, baka udah ditemu semua, pengawa niang ti chakah gawa negika hak peranak Sarawak kelebih agi raban bansa Dayak ba tanah Adat Bansa Asal (NCR) enggau hak ke bukai patut nyadika teladan rebak baru enggau dudi hari.

“Tunda pengawa ti manah nyadika lalau kitai raban bansa. Niang udah ngerandang jalai ungkup kitai, anang enda nampung pengawa ba tanah ti udah diperimba niang.

“Kitai masa niang ukai semina nengah jaku sampi, jaku kenang aja, tang tali pengawa ti udah dikereja iya ungkup bansa,” ku Victor ke lalu nyadi Mandal Presiden II Pedas, madah nyemetak lebuh meri jaku ngelalu ba mua mayuh.

Antara raban ari Gem- pung Ukai Dikuasa Perintah (NGO) Dayak ke bukai ti bisi datai ngulu pengawa tu seraya meri basa ngagai niang Bill baka Dayak ThinkTank Group (DTTG), Serakup Dayak Iban Sarawak (Sadia), Akademi Serakup Dayak Iban Sarawak (Asadia), Pemansang Dayak (PD), Terabai Menoa (TM), kaban Parti Keadilan Rakyat (PKR) sereta raban ngatika diri ke bukai.

Urung 100 iku volunteer ngulu pengawa lemai nya, berengkah diatur urung pukul 7 lemai lalu tembu urung pukul 9 malam, disimpul ngena jaku sampi enggau pengarap ngambika kes niang diputar ngena jalai ti lurus ari raban ti ngatur pengawa undang-undang di menua tu.

Bala ketuai ti nguluka raban NGO sida mega dipebasa mansutka penemu, buah kenang beserimbai enggau pengawa lemai nya.

Sida tu iya nya Sybestine Gambong ari DTTG, Simon Joseph ari PKR, Sidi Munan ari Sadia, Mambong Unggang ari Asadia enggau Valentine ari PD sereta pengari ari sida niang sebilik.

Pengawa ke sebaka mega diatur di Trafik Light Emart, Tudan Miri, tanah puang ba mua Hotel Oriental, Sarikei, Rumah Asap Norinayen, Sungai Lalau, Entawa di Sri Aman, di laman rumah Penyanding Penemu Pedas Balai Ringin, Petrus Simon Awan lalu diatur berebak selampur menua.

SAMPI: Bala Pedas Kuching, NGO Dayak sereta bala bukai nyadaka leka sampi minta semengat niang diau likun sereta minta kes niang Bill dipechara ngena jalai ti lurus.

BASA: Bala kaban Pedas Sarikei diuluka Sapit Ketuai Pampang (TKC) Alex Chia enggau Ketuai Pampang (KC) Pedas Sibu, Mathew Mudai sereta bala bukai ngelimpangka awak diri nungkun dian masa pemidang niang Bill di tanah puang ba mua Hotel Oriental, Sarikei.

SINU: Pedas Pampang Sri Aman diuluka KC Jackson Bara nungkun dian ba laman Rumah Asap Norinayen, Sungai Lalau, Entawa di Sri Aman bela sinu ati ngenang pemidang niang Bill taja udah manggai 2 taun.