Musa: Raban PNK Miri ngarapka bantu ninting bulan enda diketu
MIRI: Sepenyampau 350 iku kaban Serakup Raban Berikan Kandang Menua (PNK) Miri deka kena pangka enti sema bantu ninting bulan antara RM200 ngagai RM300 ngagai raban berikan diketu.
Chairman PNK Miri, Musa Bujang lebuhka dirandau madah bela nerima sebana ari raban berikan Miri laban nadai nerima bantu ninting bulan baka selama.
“Kitai nerima mayuh kangau ari raban berikan sebanaka sida nadai nerima bantu ninting bulan baka selama nengah bank apin lama ke udah,” ku iya lebuh dirandau Utusan Borneo kemari.
Ku Musa, enti bantu ninting bulan nya diketu, ke alai majoriti raban berikan deka berasai asa enggau nyima senentang penerang pemadu baru nya.
Bantu ngagai raban berikan nya udah diberi kenyau ari taun 2008 dikena mantu ngelempungka tating belanja idup sida.
Taja pia, enti perintah bepegai teguh enggau penemu deka ngetuka bantu ninting bulan raban berikan tu ke alai iya deka nambahka tating raban nya.
Sebedau tu, Menteri Besai Tun Dr Mahathir Mohamad mantaika penemu ti besibil enggau Menteri Bumai enggau Industri Betanam Betupi, Salahuddin Ayub bekaul enggau bantu ninting bulan perintah ngagai raban berikan.
Tun Mahathir madahka perintah bisi langgur penemu nginsil bantu ngagai 57,000 raban berikan serata menua seraya ku Salahuddin, semua bantu bekaul bajet ditampung baka selama.
Raban berikan mantaika sebana elawin sida enda dipasuk ke dalam bank nyata agi ngayanka berita angin ti madahka bantu perintah nya udah diketu.
“Kitai agi nganti status ke amat bantu ninting bulan tu sekalika iya ditampung tauka enda, taja pia kitai arap amat iya ditempung,” ku iya nerang.
Penyampau bantu raban berikan iya nya RM300 ungkup raban berikan Zon A, RM250 raban berikan Zon B, RM200 raban berikan Zon C enggau RM150 ungkup raban berikan Zon C2.
Kelimpah ari nya, raban berikan mega nerima bantu bukai ti disedia nyengkaum minyak subsidi, bantu bot sereta keraban nangkap ikan.
Berindik ari nya, Musa ngarapka bala kaban PNK Miri sabar, enda begau sereta nganti pemutus perintah bekaul enggau bantu nya.