Sepengudah Kort Besai nulak peminta Petronas ke nitihka undang-undang ti diletakka
SIBU: Perintah nengeri deka berengkah megai sektor minyak enggau gis nengeri tu berengkah 1 Julai ti deka datai bepun ari Kort Besai nulak peminta Petronas ensana.
Kepala Menteri Datuk Patinggi Abang Johari Tun Openg madah, tu nitihka undang-undang ti udah diletakka dalam konstitusyen.
“Reti iya, sebagi ari kuasa ari baruh Ordinan Perlombongan Minyak Sarawak 1958 (OMO) deka dipejalaika Petroleum Sarawak Berhad (PETROS),” pia ku iya maya dirandau pengarang berita.
Dulu agi ari nya iya ngulu Majlis Ramah Tamah Hari Raya Aidilfitri Kunsil Nengeri (DUN) Nangka ba Dewan Kelab Melayu Kampung Nyabor (MUC) Sibu, Kampung Bandong ditu, kemari.
Pengerami nya diatur Palan Servis DUN Nangka.
Abang Johari madahka perintah deka nyeruri undang-undang OMO ari sukut terminalogi ketegal bisi pekara ke enda engkeman agi dikena.
“Ambika banding baka undang-undang ‘Chief Secretary’ ke diatu nadai agi ‘Chief Secretary’.
“Tu deka ditukar kitai ngagai Kaunsil Aum Perintah Nengeri. Tu siti ari pekara deka dikemanah dalam OMO,” ku iya nerang baru.
Iya maya tu bela madah baru nama ke nyadi diatu iya nya Sarawak bisi undang-undang nengeri alai piak Petronas meseti nitihka undang-undang nengeri tu.
“Kitai ukai deka ngaga pekara ke enda patut.
“Sektor minyak enggau gis deka bejalai baka ngelama tu.
“Semina diatu Sarawak bisi hak bejalaika pengawa ba sektor minyak enggau gis nitihka undang-undang dalam konstitusyen,” pia ku iya madah.
Sama bela datai maya tu iya nya bini Abang Johari, Datuk Patinggi Dato Juma’ani Bujang, Menteri Muda Pelajar enggau Pemansik Sains sereta Pengawa Berumah enggau Pengerai Mensia Mayuh Dr Annuar Rapa’ee enggau Residen Sibu Charles Siaw.
Reti iya, sebagi ari kuasa ari baruh Ordinan Perlombongan Minyak Sarawak 1958 (OMO) deka dipejalaika Petroleum Sarawak Berhad (PETROS). Datuk Patinggi Abang Johari Tun Openg Kepala Menteri