Ubah runding kena nyapai pengidup ti menyana agi, ku Norina
KUCHING: Beserimbai enggau pengerami Ngiling Bidai kelai pengawa nutup Gawai, Norina Umoi Utot diarika bala kaban Parti Keadilan Rakyat ( PKR) Sri Aman, enda muai awak ngatur pejalai nemuai seraya nangkup kangau ngabang ari peranak di Rumah Meluda, Kampung Ibol, Sri Aman.
Penemuai sida sebuat mega dikena meri terima kasih ke sukung enggau basa peranak menua nya rambau Pengawa Bepilih Besai Ke-14 (PRU14) tu tadi sereta mega ba Pengawa Bepilih Nengeri Ke-11 (PRN11), ti udah ngelalu penatai iya enggau sida sebuat lebuhka bekimpin suba.
Nengah pengerami tu mega ku Norina, tu siti ari chara dikena nanggam teguh agi kaul ti udah bisi disintal antara sida seraya berami begulai enggau peranak rumah panjai nya nutup Gawai.
“Seruri kaul ti agi bisi penimpang, serakupka penemu, sebela ke singkang kaki kitai sereta begulai ngempung penemu pulaika pemansang rumah panjai enggau menua kita.
“Kitai bela udah ngasai pegai perintah sebedau tu, lalu diatu kitai ba renggat perintah besai dipegai perintah baru, Pakatan Harapan ( PH), endang patut kitai enggai ngubah runding enggau tuju kuing idup kitai dikena nyapai pengidup ti menyana agi.
“Anang bisi ati sanggu tauka nangi berubah. Tunda bala menyadi kitai ti udah mujur milih pengari sida ari PH baka di Saratok, Selangau, Puncak Borneo enggau Mas Gading.
“Tu chunto pemadu manah dikena kitai nela pemujur dudi hari,” ku Norina mesan nengah jaku dikenataika pengari iya, Yen Jebeni.
Nangkan nya, beri pemerat ba pelajar sekula bala anak, kelimpah bidang ekonomi enggau bidang bukai, laban ku Norina, pelajar tu nyadi kereban besai ngulihka penemu, pengelandik, ti deka nempa rebak dudi ba pengidup ti meruan agi.
Ngelansa pasal atur pengerami sehari nya, Norina meri terima kasih ngagai komiti ngatur pengerami, peranak rumah panjai ke bukai ti udah kiruh ngangau ngabang sereta ngelalu penatai sida sebuat.
“Terima kasih ke pemanah kita,” ku Yen ngarika Norina bejaku ba mua mayuh rambau atur pengerami sehari nya.