PPBM diterima tama ke Sarawak
Tepulai ngagai Tun Dr Mahathir empu laban ari konteks Sarawak, kitai endang deka bekerejasama dalam konteks parti Sarawak
KUCHING: Bepanggai ba Menteri Besai Tun Dr Mahathir Mohamad deka ngerembaika Parti Pribumi Bersatu Malaysia (PPBM) ti betuaika iya ngagai nengeri tu.
Perkara tu nyemetak dipadah Kepala Menteri Datuk Patinggi Abang Johari Tun Openg lebuh dikerandau ba Pengerami Nerima Pengabang Aidilfitri Kaban Kunsil Nengeri (ADUN) Tanjung Datu, Datuk Amar Jamilah Anu di Damai, Santubong ditu, malam kemari.
“Enti sema Tun deka ngemesaika singkang iya,tu pemutus parti iya empu laban kitai pan bisi parti (komponen PH) ke bukai ti bisi sayap ditu.
“Taja pia, ari sukut Sarawak empu,kitai endang deka bekerejasama dalam konteks parti Sarawak,” ku iya.
Ditanya sekalika bisi pekara nya disebut maya gempuru khas Aidilfitri begulai enggau Tun Mahathir Ahad tu tadi, Abang Johari ke mega Chairman Gabungan Parti Sarawak( GPS) nyemetak madah, pekara nya nadai dikerandau.
“Kitai semina ngerami Hari Raya, bejaku pasal pemakai (pemakai ti bisi dinah),” ku iya nambah seraya diaku Sapit Kepala Menteri, Datuk Amar Awang Tengah Ali Hassan.
Pia mega ku Abang Johari, bala sida bedau nemu penerang silik pasal pekara nya.
“Aku bedau nemu lagu, penerang silik pasal pekara tu nadai, engka silap ‘quote’ kitai enda nemu,” ku iya.
Ba aum pengarang berita kemari,Tun Mahathir deka numbuhka pampang parti PBPM di Sarawak tang enda di Sabah laban Parti Warisan Sabah nyadi bakih.
Sebedau tu, lebuh dalam Barisan Nasional (BN), berengkah ari jeman Tun Abdul Taib Mahmud, ditangkanka Tan Sri Adenan Satem enggau Abang Johari empu, sida nadai kala meri peluang ngagai UMNO numbuhka pampang di Bumi Kenyalang.
Sama bisi datai ngabang ngagai pengerami nya, Datin Patinggi Dato Juma’ani Tuanku Bujang, Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit Dato Sri Fatimah Abdullah, Menteri Muda Jalai Tebing Pantai Datuk Julaihi Narawi,Menteri Muda Pelajar enggau Pansik Teknologi Dr Annuar Rapaee, Sekretari Perintah Nengeri Tan Sri Datuk Amar Mohamad Morshidi Abdul Ghani sereta bala temuai dipebasa ke bukai.
Enti sema Tun deka ngemesaika singkang iya, tu pemutus parti iya empu laban kitai pan bisi parti (komponen PH) ke bukai ti bisi sayap ditu.