Manyin: Sarawak agi nganti atur ari KPM
MIRI: Menteri Pelajar, Sains enggau Pansik Teknologi, Dato Sri Michael Manyin madah, Sarawak nganti atur pengawa udah tu sentang isu ti nyadi ba sekula berindik ari aum enggau Menteri Pelajar Dr Maszlee Malik apin lama ke udah.
Iya mansutka jaku tu nyaut tanya ari The Borneo Post baka ti dipinta bala apai indai enggau mensia mayuh ngambika nyambung sekula menua pesisir ngagai sistem grid kuasa nengeri dikena mutarka penanggul besai belanja diesel dikena injin api mansutka kuasa karan ba kereban elektrik.
“Udah nyata diterang dalam BP (The Borneo Post) apin lama ke udah ke alai opis menteri nguji mutarka isu ti udah dibantaika kami lebuhka berandau enggau menteri. Anti aja nama atur pengawa udah tu,” ku iya nyaut nengah Whatsapp.
Mayuh sekula menua pesisir di nengeri tu diatu dalam rintais diambung ngagai sistem grid tang tu agi bedau nyadi nyata.
Manyin nadai madah silik penyampau tauka sekula ti diperambu enda tau enda disambung tu tang iya udah nyaut ba aum DUN ke alai semua sekula semak enggau sambung kuasa grid (iya nya) deka disambung enggau kuasa karan ari kuasa grid.
Berita madahka sebuah sekula Sekula Primari (SK) Long Tengoa di sitak Ba’Kelalan di Lawas semina beberapa meter aja penyauh ari sambung kuasa ti udah datai di genturung pendiau Long Tengoa kenyau ari taun 2010 tang agi bepanggai ba diesel dikena ngidupka injin api.
Iya napi penanggul suntuk minyak rambau kemisi sekula tu tadi lalu berita madahka lebih ari 40 buah sekula primari enggau sekondari di Bagi Menua Miri enggau Limbang napi penanggul suntuk diesel urung lebih ari 10 hari laban kunteriktor ti dipilih gawa puntan ngisi tangki minyak ketegal betalatka bayar kereja ti udah digaga sida.
Sekula di kandang menua tengah Sarawak, nyengkaum sida di Selangau mega.
Penanggul tu mangka sekula ti bepanggai ba minyak ti dikena ba kereban elekterikal, pam ai, nyimpan pemakai enggau pekara pemeresi.
kena 24 Jun tu tadi, Menteri Muda Pelajar enggau Pansik Teknologi madahka di Sibu, sekeda sekula di nengeri ti besemak enggau grid kuasa udah dikelala ngambika disambung kuasa karan berenggat nentuka sida ulih ngasaika bekal kuasa karan ti meruan agi.
Ku iya, pekara tu udah dirandau enggau menteri pelajar rambau aum sida kena 22 Jun berandauka isu ti mangka sekula, nyengkaum penanggul sekula suntuk diesel ke alai udah nya kunteriktur setuju terus nganjung bekal.
Taja pia ku Dr Annuar, pengawa nyambung baru tali karan begunan sekula patut digaga sebedau iya ulih disambung ngagai sistem grid.
Kaban Kunsil Nengeri (ADUN) Tamin, Christopher Gira madahka iya udah mantaika pekara nya rambau Aum Kunsil Nengeri (DUN) nyin tadi ba pekara sebarang sekula semak enggau grid kuasa disambung enggau kuasa karan ari grid kuasa.
Bisi 13 ari 19 buah sekula di sitak dipegai iya ti chukup semak enggau grid kuasa Sarawak Energy Berhad (SEB).
Apin lama ke udah ku Gira, iya ngarapka sekula tu deka jampat disambung enggau bekal kuasa karan 24 jam ari grid kuasa nyadi chara mutar ungkup timpuh panjai dikena nyeliahka pelajar tejanggal sebarang maya napi penanggul bekal diesel.