Unifor deka bisi komplek kediri empu jemah ila

KUCHING: Unit Pengarap Bukai (Unifor) bisi netapka juluk ngembuan komplek sida empu ditu jemah ila.

Sapit Kepala Menteri Datuk Amar Douglas Uggah Embas madahka Kabinet Nengeri udah ngemendarka tanah nengeri tiga ikar pemesai endur nirika komplek Unifor di jalai Ong Tiang Swee.

Ku iya, komplek ti diperambu enti udah tembu, deka endur opis Unifor sereta mega perengkaguna bukai ungkup pengawa merambu, baum enggau ke bukai.

“Komplek tu ulih nyadi palan gempuru semua kitai ari gempung pengarap bukai nampung kaul enggau pangan diri dikena nentuka kitai seruran nerenakka ulah bebaik ba pengarap di nengeri Sarawak.

“Tu beguna amat baka ti dikemeratka Sarawak,” ku iya rambau pengawa nyuaka geran ngagai Anglika Kandang Kuching enggau Serakup Sikh Sarawak di opis iya di Wisma Bapa Malaysia ditu, kemari.

Ditanya kemaya komplek nya deka tembu, ku iya, pekara tu mar deka ditimpuh laban sida agi ba renggat perambu naka diatu.

“Kitai ngarapka iya deka digaga lalu tembu enggau naka penyampat,” ku iya.

Uggah, ti nyadi menteri menggau pangku pengawa unit nya madahka sida berasai lantang enggau status Unifor diatu laban iya bisi nerima belanja enggau tanah endur ngentak komplek.

“Reti iya, kitai ulih nyediaka servis baka ti dipelaba gempung pengarap bukai di Sarawak diatu.

“Asai aku, semina kitai aja di Malaysia ngembuan unit ke bansa tu,” ku iya.

Unifor udah ditumbuh dalam bulan April 27 taun nyin tadi lalu diengkah di baruh Opis Kepala Menteri.

Batang pengawa iya nyaga pekara pengarap bukai (kelimpah ari Islam) di Sarawak baka ba pengawa enggau ngemanahka rumah sembiang, nyemela enggau ngemuntangka peminta ba taba begunan pengarap sereta pekara bukai ti meri empas ngagau gerempung pengarai ukai-Islam di Sarawak.

Dataika diatu, Unit tu bisi 17 iku staf lalu dipelaba deka nambah.

Ku Uggah, Kabinet Nengeri mega udah ngemendarka pengawa numbuhka Sarawak Unit for Other Religions Charitable Trust kena 29 Mac taun tu.

Ku iya, tuju pengawa tu deka ngintu pengelantang pengarap bukai di baruh bidang kuasa Unifor.