Rainforest Fringe Festival 2018 deka diatur 6-15 Julai
KUCHING: Rainforest Fringe Festival (RFF) 2018 deka diatur berengkah ari 6 ngagai 15 Julai tu, deka meda bemacham program ti manah baka pemandang terus, pengawa mandang, seni enggau muzik.
Direktor festival, Joe Sidek madahka fokus ngagai pengawa pemerindang ngepunka festival diberi nama ‘ SARAWAK: An Indigenous Journey’ ti deka dibantai ungkup keterubah endar.
“Taun kedua RFF tu, kami udah mayuh nerima inspirasyen ari peranak Sarawak lalu kami ngarapka RFF ulih mantu nerenakka semengat nasional Sarawak,” ku iya ba jaku penerang RFF 2018 di Borneo744 ditu, kemari.
Sama bisi datai Menteri Dagang Temuai, Seni, Main Asal, Nembiak enggau Lumba Datuk Abdul Karim Rahman Hamzah, Menteri Muda Dagang Temuai, Seni enggau Main Asal Datuk Lee Kim Shin enggau Sekretari Mendam Opis Menteri, Hii Chang Kee.
RFF taun tu meda kerejasama enggau peranak Sarawak, kelebih agi raban kreatif menua tu enggau bala pakar ari bemacham bidang enggau sektor nyadi siti fokus besai dikena ngerembai enggau penyelai festival.
Ba lansa bukai ku Karim, iya temegah ati amat meda kerejasama antara mayuh amat raban bepenau Sarawak lalu tu ngayanka semangat beserakup ti teguh amat ba raban bansa nengeri tu.
“RFF nyadi siti komponen ti beguna amat meransang ekonomi sosial enggau budaya Sarawak.
“Aku berasai temegah meda mayuh orang ari bemacham serak komuniti ulih ngasaika pekara ti ngemegahka Sarawak,” ku iya.
Taun tu, RFF mantaika raban enggau bala artis baka Dewa Liana Seriestha, Raziman Sarbini, Vicky Fong, Francesca Ang, At Adau, Alena Murang, Universiti Malaysia Sarawak (Unimas), Dr. Monica Janowski enggau Kumpulan Budaya Bung Bratak mantaika SARAWAK: An Indigenous Journey.
Ungkup program ‘Bamboo That Binds and Wood’, RFF bekerejasama enggau Borneo Arts Collective, Wendy Teo, USCI University sereta raban bepenau kraf menua tu.
Program The Market tauka pasar jual beli ngemataka pereka fesyen Arzmy Hargreaves nyadi sebagi ari ‘ Pop Up Fashion’ enggau mega ‘ Big Bad Wolf’ deka tama ngagai makit Sarawak ungkup keterubah iya.
RFF deka diatur di bemacham endur baka Borneo744, The Old Courthouse, Hotel Waterfront, Pullman Kuching enggau Cove 55.
Semua program enggau pengawa mandang nadai bebayar lalu mensia mayuh tau ngerejista nengah website www.rainforestfringe. com di baruh POP Events (grabapop.com).
RFF dipelanja Opis Menteri Dagang Temuai, Seni, Main Asal, Nembiak enggau Lumba enggau kerejasama Kaunsil Dagang Temuai Sarawak.
Pengawa ngatur RFF berengkah ari taun 2017, ke alai festival pengelama 10 hari tu dikena ngerami semangat enggau penegap Sarawak enggau mantaika budaya sereta pengerichah Sarawak ti nyelai nengah muzik, seni, filem, foto enggau langkar ke digaga.