Bakani GPS tauka BN ngeletakka pemesai PG/PM Dayak, ku Vernon
Pengawa GPS/BN Sarawak ti deka ngeletakka tatak pemesai PG/PM sigi ukai ari adat
KUCHING: Ketuai Pemadah Pakatan Harapan (PH) Sarawak, Vernon Kedit nanya bakani ku Gabungan Parti Sarawak (GPS) tauka Barisan Nasional (BN) tau ngeletakka tatak pemesai Pulau Galau (PG) enggau Pemakai Menua (PM)Dayak laban tetiap batang sungai enggau bansa Dayak nitihka adat sida sigi bebida ba senentang pemesai.
Ku Vernon, pengawa GPS tauka BN Sarawak tu ti deka ngeletakka tatak pemesai PG/PM kitai sigi ukai utai ti berindik ari adat.
“Tang utai ke pemadu besai reti sereta nyadi penanggul ba kitai, iya nya sapa ti bempu tanah ba luar kandang tanah ti udah di tatak nya tadi? Ukai tanah Perintah tauka ‘State Land’?
“Dalam undang- undang ‘ Usufructuary Right’, reti iya kita tau ngena tanah nya tadi tang kitai nadai kuasa bempu ari undang-undang. Bisi kuasa Ngena enggau Bempu tu 2 iti utai ti chukup bida,” ku iya madah nengah penerang ti dikeluarka ulih iya empu ditu, kemari.
Iya nandu baru madahka pengawa tu tau disemaka kitai enggau Adat ‘Nasih Bumai’ kitai Iban.
“Tanah sigi enggi orang tang kitai nginjau tanah iya alai bumai. Udah ngetau, kitai alu meri orang ti bempu tanah nya, padi tauka mata duit.
“Ukai mega reti nya nyuwa, nya Adat ‘Nasih’ ku kitai. Minta kasih, nya reti iya pelaba aku.
“Tutadi siti utai ti salah laban jauh bida ari reti PG/ PM kitai ti bendar, iya nya ‘Kitai bempu tanah ti sah ari undang- undang’, ukai kitai nasih ari orang bukai,” ku iya.
Lalu pia mega, utai tu ku iya ukai utai ti berindik ari Adat kitai Dayak!
“Nama kebuah kitai ka kiruh nasih ngagai orang enti sema tanah nya endang tanah kitai?,” pia ku tanya Vernon.
Enti nitihka ‘Draft Bill’ ku iya, Undang-undang Tanah Sarawak tu tadi, reti iyaorang ti bempu tanah nya sigi Perintah, ku iya.
“Pemutus meri ‘ Native Territorial Domain’ nya tadi, iya nya Direktor Opis Tanah & Survei (JTS), kitai ulih ngapil ngagai Menteri ti bempu kuasa penuh ngaga pemutus tang enda ulih dibai bechara ba kort enti sama bisi penanggul tauka penyarit,” ku iya.
GPS tauka BN Sarawak ku iya, deka ngambi jalai muntang kena ngatur penang- gul enggau penyarut Tanah NCR kitai Dayak tang Perintah agi bempu PG/PM.
Vernon nyimpul jaku iya madahka PG enggau PM kitai dikumbai ‘Native Territorial Domain’, bisi ditatak pemesai ngena hektar tang lalu bedau diputuska sekeda pemesai.
“Pia mega ‘Native Territorial Domain’ tu semina diberi kuasa ba undang-undang ti dikumbai ‘Usufructuary Right’ ti ngembuan reti ‘Tau Dikena Tang Ukai Sereta Enda Tau Bempu’,” ku iya.
Lalu baka nya mega enggau reti ‘Native Territorial Domain’ tu bepanggai ba Direktor JTS enggau Menteri, alu nadai chara mai ngagai Kort bechara enti sema bisi penanggul tauka penyarut, ku iya.
“Orang ti diberi kuasa ngena ‘Usufructuary Rights’ tu tadi dipinta mayar suwa ninting taun. Reti iya, kitai mayar ngagai Perintah taja pan ngena tanah kitai empu! Nya utai ti chukup ngemelikka kitai,” ku iya.
Dalam undang-undang ‘Usufructuary Right’, reti iya kita tau ngena tanah nya tadi tang kitai nadai kuasa bempu ari undang-undang. Bisi kuasa Ngena enggau Bempu tu 2 iti utai ti chukup bida.