Malaysia menua demokratik, barang parti tau muka pampang di nengeri tu
SIBU: Menteri Pengawa Dagang, Seni, Adat Pesaka, Nembiak, Lumba enggau Main, Datuk Abdul Karim Rahman Hamzah madah iya alit ati pasal peneka Parti Pribumi Bersatu Malaysia ( Bersatu) ke deka ngerembaika sayap sida iya ke Sarawak.
“Aku pan alit ati lalu nanya diri empu nama kebuah Bersatu deka ngerembaika sayap sida iya ke Sarawak.
“Enggau pemayuh parti asal ari menua tu empu, pengundi deka napi penusah ngaga pemutus bekait enggau ni bagi parti ke deka dipilih sida iya,” ku iya kemari.
Iya madah munyi nya lebuh diasuh nimbal bekait enggau peneka Bersatu ngerembaika sayap sida iya ke Sarawak.
Pekara tu udah dipadah ulih Menteri Besai ti mega nyadi Chairman Bersatu, Tun Dr Mahathir Mohamad ba aum pengarang berita, kemari.
Dr Mahathir madah bisi peminta ke parti nya numbuhka pampang sida iya di Sarawak.
Taja pia ku iya, Bersatu enda masuk ke Sabah laban parti Perintah ke megai Sabah diatu, Parti Warisan Sabah begempung enggau sida iya.
Ku Abdul Karim, taja pia Malaysia sebuah menua demokratik, lalu barang parti tau muka pampang sida iya di menua tu.
“Parti tu diterima tauka enda ulih rayat Sarawak, agi tumu endar enti deka nimbal enggau silik agi,” ku iya.
Ba lansa bukai, Kepala Menteri Datuk Patinggi Tun Openg madah Sarawak deka majakka kaul kerejasama enggau parti menua tu ke mungkur raban Gabungan Parti Sarawak (GPS) taja pan Bersatu bisi ati deka ngerembaika sayap sida iya ngagai menua tu.
Abang Johari madah enti Tun Dr Mahathir deka mai Bersatu ke Sarawak, nya pemutus parti nya empu.